DILI, 09 Abríl 2025 (TATOLI) – Reuniaun Konsellu Ministru aprova proposta lei kona-ba alterasaun daruak ba lei númeru 7/2022, loron 19 fulan-Maiu, ne’ebé aprova Estatutu Ministériu Públiku nian.
Ministru Justisa, Sérgio Hornai, esplika katak objetivu husi proposta lei ida-ne’e mak atu introdús norma ida iha dispozisaun tranzitória no finál, ne’ebé sei permite katak Prokuradoria Jerál Repúblika, liuhusi ninia órgaun jestaun no dixiplina, bele nomeia majistradu sira ne’ebé, to’o kria kondisaun adekuada sira, seidauk iha kategoria ka klase ne’ebé prevee iha Estatutu, hodi okupa kargu sira Inspetór Koordenadór Ministériu Públiku no Prokuradór Repúblika Koordenadór nian.
“roposta lei ne’e atu halo de’it revogasaun ba iha artigu balun ne’ebé iha relasionamentu ba iha Prokuradór Jerál Repúblika, atu ezerse nia funsaun hanesan órgaun konstitusionál ba iha buat balun ne’ebé lei númeru 7/2022, iha ne’eba lakuna balun ekipa ba iha rekrutamentu ne’e seidauk bele konklui nia serbisu sira”, governante hateten iha Palásiu Governu, ohin.
Nia dehan to’o realizasaun konkursu no promosaun majistradu ba kategória Prokuradór Repúblika Rekursu, alterasaun ida-ne’e sei permite mós kargu sira ne’ebé ezije kategória ida-ne’e tuir estatutu, bele nomeia Prokuradór Repúblika Klase da-1.
Tuir nia, alterasaun ida-ne’e sei posibilita mós katak Prokuradoria-Jerál Repúblika, liuhusi ninia órgaun jestaun no dixiplina nian, tuir Konstituisaun Repúblika, realiza konkursu hodi hetan asesu ba kategoria Prokuradór Repúblika Rekursu nian.
Artigu balun ne’ebé halo revogasaun ne’e iha relasaun ho oinsá halo nomeasaun ba iha Inspetór Koordenadór nomós ba iha Ministériu Públiku, no kordenador sira iha munisípiu, nomós halo promosaun ba iha vaga sira.
“Entaun ita halo simplifikasaun ida ba lei ida-ne’e para atu bele fó biban ba Konstituisaun Repúblika, liuliu iha artigu 132, númeru 5 nune’e Prokurador Jerál iha kbiit uitoan atu halo transferénsia, nomeasaun, halo ezonerasaun no halo atividade medida balun ne’ebé hakbiit liu tan iha servisu estrutura Ministériu Públiku nian”, nia dehan.
Notísia relevante: Komisaun A halo audiénsia ho Governu kona-ba alterasaun estatutu Ministériu Públiku
Jornalista: Arminda Fonseca
Editora: Maria Auxiliadora
