DILI, 09 Abríl 2024 (TATOLI) – Governu, liuhusi reuniaun Konsellu Ministru, aprova projetu rezolusaun hodi suspende abertura siklu estudu foun iha Ensinu Superiór.
Rezolusaun ida-ne’e nia objetivu mak suspende kriasaun ba kursu foun baxarelatu, lisensiatura, pós-graduasaun, mestradu no doutoramentu nian iha área sira ne’ebé kobre barak ona iha oferta sira ne’ebé eziste iha instituisaun ensinu superiór nian.
“Medida ne’e ho objetivu atu evita saturasaun (ne’ebé liu tiha limite) husi merkadu traballu ho profisionál iha área sira ne’ebé eziste ona númeru sufisiente husi formadu sira, hodi promove adekuasaun ida ne’ebé di’ak liu entre oferta edukasionál no nesesidade país nian”, informa nota husi Governu ne’ebé TATOLI asesu, ohin.
Suspensaun ne’e afeta ba área sira mak hanesan kursu Direitu ka Siénsia Direitu, Jestaun, Kontabilidade, Jestaun Finanseira, Jestaun Públika, Enjeñaria Sivíl, Enjeñaria Informátika, Konstrusaun Sivíl, Saúde Públika, Enfermajen, Parteira, Administrasaun Públika, Siénsia Polítika no Relasaun Internasionál.
“Instituisaun ensinu superiór sira sei labele loke kursu foun sira iha área sira-ne’e to’o diploma legál foun sira kona-ba planeamentu kurrikulár no regulamentu ba siklu estudu nian hetan aprovasaun. Rezolusaun Governu ida-ne’e mós determina hodi taka kedas kursu doutoramentu ne’ebé la hetan autorizasaun ne’ebé la’o hela iha rai-laran”, afirma.
Medida ida-ne’e sei tama iha vigór to’o konklui prosedimentu lejizlativu ne’ebé nesesáriu ba regulamentasaun kompleta ensinu superiór nian, ne’ebé permite halo avaliasaun hikas ba oferta kursu tuir nesesidade merkadu traballu no evolusaun setór edukativu nian.
Tuir dadus, Instituisaun Ensinu Superiór Públiku no Privadu ne’ebé eziste ona iha Timor-Leste hamutuk 19, husi númeru ne’e ida mak seidauk akreditadu.
Jornalista: Arminda Fonseca
Editora: Maria Auxiliadora
