Janeiru-Marsu, Sala Emerjénsia HNGV rejistu pasiente hamutuk 16.947
DILI, 09 Abríl 2025 (TATOLI)—Durante Janeiru to’o Marsu 2025, Sala Emerjénsia Hospital Nacional Guido Valadares (HNGV), rejistu pasiente ne’ebé mak halo tratamentu saúde hamutuk 16.947.
“Iha fulan-Janeiru ita rejistu pasiente ne’ebé mak mai iha emerjénsia hamutuk 6.008. Husi ne’e, feto hamutuk 3.146 no mane hamutuk 2.862. Iha Fevereiru, totál pasiente hamutuk 5.238. Husi ne’e, feto hamutuk 2.772 no mane hamutuk 2.466. Iha fulan-Marsu, hamutuk 5.701. Husi ne’e, feto hamutuk 2.886 no mane hamutuk 2.815,” Xefe Departamentu Emerjénsia HNGV, Júlia Rodrigues hateten iha nia kna’ar fatin, HNGV, Bidau, kuarta ne’e.
Nia dehan, pasiente sira mai aprezenta iha kazu oinoin, balun mai ho moras todan no balun mai ho asidente sira.
“Iha sala emerjénsia mós rejista pasiente ne’ebé mak hetan asidente ho karreta no motór hamutuk 1.140,” nia haktuir.
Júlia hatutan, iha Janeiru, pasiente sira-ne’ebé mak seidauk to’o iha emerjénsia maibé mate ona iha dalan ne’e, emerjensia rejistu pasiente feto na’in-haat no mane na’in-sia. Iha Fevereiru, pasiente ne’ebé mak mate tuir dalan no lori mai iha-ne’e médiku sira apenas atu halo klarifikasaun, iha pasiente feto na’in-haat, mane na’in-sanulu. Nune’e, pasiente ne’ebé mate iha emerjénsia feto na’in-hitu no mane na’in-haat. Iha Marsu, pasiente sira-ne’ebé mate iha dalan ne’e feto na’in-hitu, mane 14, depois pasiente mate iha emerjénsia feto na’in-rua no mane na’in-hitu.
“Ida-ne’ebé mak mai mate ona ne’e barak liuhusi asidente ne’ebé mak hetan pankada maka’as iha ulun no fakar raan barak no lori mai-ne’e atu halo de’it klarifikasaun ba pasiente sira-nia família katak hakotu iis iha dalan no inklui pasiente ne’ebé mak hetan atakasaun fuan sira. Ezemplu, sira-ne’ebé mak monu derepente iha hariis-fatin no hetan atakasaun derepente família lori mai lori tempu naruk uitoan, liu ona minutu 15. Entaun, lori mai atu klarifika de’it katak pasiente ne’e labele salva vida, tanba pasiente ne’e mate antes to’o iha emerjénsia,” nia esplika.
Jornalista: Felicidade Ximenes
Editór: Xisto Freitas da Piedade
