KOVALIMA, 10 Abríl 2025 (TATOLI)—Governu liuhusi Ministériu Petroleu Rekursu Minerál (MPRM) no Timor Gap, Empreza Públika (Timor Gap, EP) konstrui uma hamutuk unidade 63 ba família afetadu husi Aeroportu Komandante Em-Chefe Kay Rala Xanana Gusmão Suai duadaun ne’e atinje ona 21%.
“Uma sira-ne’ebé mak ami fahe ba faze rua, faze primeiru atu responde ba 23 unidade ka família ne’ebé afeta emediatamente ba iha aeroportu, tanba ita hatene família 23 ne’e hela kedan iha areadór aeroportu nian. Entaun tuir planu ita tenke muda familia 23 ne’e antes loron 01 fulan-Jullu operasaun aviasaun, ida-ne’e mak ita halo uma hirak ne’e. Ita haree progresu atinje ona 21%,” Vise Prezidente infrastrutura Timor Gap, E.P. Alexandre Cristovão, hateten ba jornalista sira iha Suai-Vila, kinta ne’e.
Nia dehan, ida-ne’e planu Ministériu nian hodi harii bairru foun ba komunidade afetadu husi aeroportu.
“Ida-ne’e planu Ministeriu Petroleu Rekursu Minerál nian. Kona-ba preparativu sira ba Aeroportu tanba Governu deklara ona ba públiku katak hahú loron 01 fulan-Jullu, atividade aviasaun hotu sei mai konsentra hotu iha Suai. Entaun, ida-ne’e parte ida husi deklarasaun ne’ebé hato’o ona ba públiku atu atende ba Bayu Undang nia atividade,” nia dehan.
Vise-Prezidente ne’e esplika, uma ne’ebé konstrui iha tipu rua, tipu ida kompostu husi kuartu tolu no iha tipu seluk kuartu haat.
“Uma hirak ne’e iha tipu rua, tipu ida kuartu tolu, tipu ida kuartu haat, entaun kuartu tolu ne’e hamutuk uma 62 no kuartu haat ne’e ba uma ida (1) de’it, kada uma nia areadór 20×25 metru kuadradu,” nia esplika.
Área dezignadu ba bairru foun ne’e okupa rai kuaze ektare 5.4 no husi uma 63 ne’e inklui mós fasiliade públiku hanesan kapela, sentru komunitária, eskola ba labarik sira.
“Projetu ne’e empreza rua mak envolve, empreza kontratór hodi halo servisu fíziku ba uma sira-ne’e mak Comunity Housing husi Australia ne’ebé mai rezista iha Timor. Atu supreviziona projetu ida-ne’e ami mós envolve konsultan lokál ida atu halo asisténsia ka fó supervizaun ba iha projetu ne’e, sira mak The Tile, konsultan ida-ne’e uluk mak halo dezñu ba projetu bairru foun ne’e,” nia afirma.
Entretantu, orasamentu ba projetu ne’e hamutuk millaun $6.3 hodi konstrui uma ba família 63 no fasilidade públiku sira.
Tuir kontratu ne’ebé asina entre Timor Gap ho empreza konstrutór no konsultan projetu ne’e hala’o ho durasaun tinan rua.
“Uma hanesan ne’e ita halo ona ba komunidade afetadu autoestrada iha tinan hira liuba iha Lohorai hamutuk uma kain 62. Entaun ida-ne’e ba família afetadu husi aeroportu nian iha área Holbelis nian,” nia dehan.
Jornalista : Hortencio Sanchez
Editór : Cancio Ximenes
