VIKEKE, 10 Abríl 2025 (TATOLI)—Xefe suku Maluru, postu Vikeke Vila, munisípiu Vikeke, Bendito Soares, informa tinan 2025 ho Orsamentu husi Programa Nasionál Dezenvolvimentu Suku (PNDS) suku Maluru fó prioridade konstrui morru protesaun ba Ensinu Báziku Sentral (EBC, sigla portugés) Komandante Rosito Beaço.
“Programa PNDS suku Maluru pendente durante tinan haat hahú 2021 to’o 2024. Nune’e, ami esforsu aprezenta ba prezidente autoridade Vikeke no autoriza fila-fali suku Maluru asesu orsamentu PNDS tinan 2025 mak ami foin hetan orsamentu PNDS 2025. Ne’ebé, ba tinan ida-ne’e, ami atu koloka ba konstrusaun morru protesaun EBC Komandante Rosito Beaço,” Bendito Soares hateten ba Agência Tatoli, iha suku Maluru, ohin.
Nia relata, alokasaun orsamentu PNDS 2025 ba suku Maluru hamutuk $23,000.00 hodi konstrui morru protesaun ba eskola tanba eskola ne’e laiha morru protesaun durante ne’e.
“Tanba ne’e, ami deside uza orsamentu PNDS ba morru, sai hanesan programa perioridade ba ami-nia suku Maluru. Maske ami autoridade haree ba orsamentu la sufisiente ba konstrusaun morru, nune’e ami jere orsamentu ne’e ho di’ak para konstrusaun bele finaliza,” nia dehan.
Nune’e, nia hato’o agredesimentu ba PAM Vikeke no Governu aloka fila-fali orsamentu ba PNDS ba suku Maluru hodi dezenvolve infraestutura báziku sira iha suku.
“Tinan haat liu ba orsamentu PNDS la aloka mai ami-nia suku Maluru, tanba suku ida-ne’e área protejida ba planta LNG ne’ebé dezenvolvimentu hotu-hotu la realiza iha ami-nia suku. Tinan ida-ne’e mak ami foin simu fila-fali programa dezenvolvimentu hodi hadi’a ami-nia suku laran hodi povu asesu. Ho ida-ne’e, ha’u hato’o agradesimentu ba autoridade munisípiu no Governu koloka fali ona fundu PNDS ba ami-nia suku iha tinan 2025,” nia hateten.
Tuir nia, programa ba konstrusaun ba morru protesaun EBC komandante Rosito Beaço ne’ebé lokaliza iha suku Maluru no obra referida sei konstrusaun iha tinan ida-ne’e.
Jornalista : Vitorino Lopes da Costa
Editór : Cancio Ximenes
