KOVALIMA, 10 Abríl 2025 (TATOLI) – Autoridade Protesaun Sívil ( APC-sigla Portugés), identifika Suku Kasabauk no Beiseuk sai fatin risku ba dezastre naturál ho tipu inundasaun, iha Postu administrativu Tilomar, munisípiu Kovalima bainhira iha tempu udan.
Komandante APC munisípiu Kovalima, Celestino Ferreira Afonso, informa katak, APC fasilita formasaun, hetan apoiu husi World Vision hodi fasilita formasaun tanba identifika suku Kasabauk no Beiseuk sai risku ba dezastre Naturál ho tipu inundasaun.
“Suku rua iha Tilomar bainhira tempu udan mosu dezastre naturál hanesan erozaun no inundasaun tanba ne’e ohin ita ekipa Komisaun Kestaun Dezastre munisípiu (KJDM) liuhusi APC, hamutuk CVTL ho parseiru fasilita formasaun oinsá komunidade sira labele afeita maka’as ba dezastre naturál”, Komandante APC munisípiu Kovalima, Celestino Ferreira Afonso dehan ba jornalista sira iha sede Suku Kasabauk, postu Tilomar, ohin.
Ho nune’e APC presiza prepara sentru evakuasaun hanesan iha suku Kasabauk, identifika EBF Tabolo; presiza fasilita formasaun parte ida atu hasa’e membru Komisaun Jestaun Dezastre Suku (KJDS), nia koñesementu nune’e bainhira akontese dezastre membru KJDS halo ona evakuasaun ba vítima dezastre naturál.
APC ekipa ne’ebé atu apoia oinsá munimiza no halo mitigasaun ba komunidade sira iha fatin ne’ebé risku ba dezastre naturál.
Administradór postu administrativu Tilomar, Venancio Sarmento, rekoñese katak suku rua iha postu Tilomar, suku Kasabauk, aldeia Tabolo sai fatin risku ba dezastre naturál bainhira iha tempu udan.
Realidade hatudu, bainhira iha tinan kotuk akontese dezastre naturál, prezidente autoridade munisípiu Kovalima ho administradór postu administrativu rasik mak tuun hodi haree kondisaun vítima dezastre naturál.
“Ho membru KJDS bele hakmaan servisu atu salva ita-nia komunidade bainhira akontese dazastre naturál tanba ne’e husu ba ita-boot sira partisipa formasaun ho másimu tanba formasaun ida-ne’e importante ba ita-boot sira”, nia apela.
Iha sorin seluk, partisipante Ika Elias Bona da Luz agradese APC hamutuk ho parseiru sira tanba bele fasilita formasaun referida.
“Ami hato’o agradese bele partisipa formasaun ida-ne’e hodi aumenta ami-nia koñesementu. Dalaruma, ami interpreta sala kona-ba mosu dezastre naturál hodi fó apoiu ba vítima sira tanba suku Kasabauk risku afeita ba dezastre naturál ho tipu inundasaun”, nia dehan.
Jornalista:Celestina Teles
Editór: Rafael Ximenes de A. Belo
