Vasina Rubella no Sarampu liu doze 10.000 eziste ona iha armazein INFPM
DILI, 10 Abríl 2025 (TATOLI)–Diretór Aprovizionamentu iha Institutu Nasionál Farmaséutiku no Produtu Medikamentu (INFPM), Sergio da Costa Belo, hateten Vasina Rubella no Sarampu liu doze 10.000 to’o ona iha armazein INFPM.
“Foin lalais ne’e, Vasina Rubella no Sarampu to’o ona iha Timor-Leste hamutuk doze 10.850. Doze vasina ne’e iha hela armazein no balun distribuidu ona ba unidade ospitál sira,” Sergio da Costa Belo hateten ba TATOLI iha nia kna’ar fatin, kinta ne’e.
Diretór ne’e esplika, ekipa resesaun no inspesaun simu ona doze vasina no distribui balun ba ospitál, sentru saúde no klínika sira iha Timor-Leste ne’ebé mak sira presiza.
Notísia relevante: Semana oin, vasina Sarampu ba labarik sei to’o iha Timor-Leste
Sergio haktuir, Vasina Rubella no Sarampu to’o iha loron 07 fulan-Abríl semana ne’e.
Antes ne’e, Xefe Departamentu Imunizasaun Ministériu Saúde, Maria Angelina Pereira, rekoñese Vasina Rubella no Sarampu estoke laiha hodi vasina labarik idade fulan sia (9) iha Dili.
“Vasina ba labarik fulan sia no tinan ida-fulan neen mak Sarampu ho Rubella. Ida-ne’e mak estoke mamuk iha Dili, maibé iha munisípiu balun estoke iha hela atu vasina ba labarik sira,” Maria Angelina informa.
Jornalista: Felicidade Ximenes
Editór: Xisto Freitas da Piedade
