VIKEKE, 10 Abríl 2025 (TATOLI)—Xefe suku Maluru, postu Vikeke Vila, munisípiu Vikeke, Bendito Soares, husu Autoridade Munisípiu Vikeke apoiu fundu ba reabilitasaun kapela iha suku Maluru ne’ebé kondisaun aat.
“Ami-nia kapaela ne’e kondisaun aat, zinku taka uma leten ne’e ladi’ak ona no tempu udan ne’e udan-been tama de’it ba kapela laran no parede sira mós aat hotu ona. Iha tempu udan, difikulta ba sarani rona misa iha kapela laran. Tan ne’e mak ami hakarak husu ajuda ba Prezidente Autoridade Vikeke apoiu fundu ruma ba ami-nia kapela, atu ami bele reabilita fila-fali ami-nia kapela ida-ne’e,” Bendito Soares hateten ba jornalista sira iha suku Maluru, ohin.
Nia dehan, autoridade no komunidade esfosrsu aan buka ona fundu ba reabilitasaun iha tinan 2024 liuba, maibé lahetan fundu ruma entaun la konsege reabilita kapela no husik kapela nia kondisaun aat to’o ohin loron.
“Maske kondisaun aat, ita-nia sarani sira iha Maluru kontinua uza iha domingu rona misa. Ita tauk uma monu ba sarani sira-nia leten la metin ona. Nune’e, ohin, PAM mós haree direta ona kondisaun aat no haruka ami prepara propostu kapela nian hodi haruka ba PAM, haree buka dalan ba kapela Maluru ne’ebé kondisaun aat,” nia hateten.
Hatán ba preokupasaun ne’e Prezidente Autoridade munisípiu Vikeke Francisco Cruz Simões De Gonzaga Soares, haktuir, kondisaun kapela aat tebes ne’ebé orienta ona tekniku PDIM hodi sukat no halo kalkulasaun ba kustu reabiliasaun kapela Maluru.
“Kapela sai mós importante ba ita-nia sarani katólika sira iha suku Beaço. Ita haree kondisaun aat ne’ebé ha’u orienta ona tékniku sira sukat no sura kustu ba reabilitasaun kapela nian. Depois xefe suku haruka ba ha’u hodi buka fundu ruma apoiu ba reabilitasaun kapela Maluru,” nia dehan.
Tuir dadus populasaun suku Maluru hamutuk 1.245 ne’ebé kompostu husi mane 635 no feto 610 ho totál uma kain hamutuk 301. Enkuantu, iha suku Maluru kompostu husi aldeia tolu kompostu husi aldeia tolu (3) mak aldeia Maluru, Makaloso no Loho Oan.
Jornalista : Vitorino Lopes da Costa
Editór : Cancio Ximenes
