MS prevee rihun $350 reabilita sentru saúde sira iha TL
DILI, 11 Abríl 2025 (TATOLI)—Tinan ne’e, Ministériu Saúde (MS) prevee rihun $350 hodi halo reabilitasaun ba sentru saúde sira-ne’ebé mak kondisaun ladún di’ak ona iha Timor-Leste (TL).
“Ministériu Saúde liuhusi Diresaun Nasionál Administrasaun Lojístika no Patrimóniu tinan ne’e orsamenta rihun $350 hodi halo halo reabilitasaun ba sentru saúde sira-ne’ebé mak ho kondisaun ladún di’ak ona,” Diretór Nasionál Administrasaun Lojístika no Patrimóniu, Júlio dos Santos, hateten iha nia kna’ar fatin, MS, Kaikoli, sesta ne’e.
Nia dehan, daudaun ne’e tékniku sira bá halo ona levantamentu. Husi levantamentu ne’e mak sei haree sentru saúde ne’ebé mak prioridade.
“Ita sei la foti tomak sentru saúde no postu saúde sira-ne’ebé mak iha munisípiu sira, maibé halo identifikasaun katak ida-ne’ebé mak kondisaun ladún di’ak ona mak sei foti ida-ne’e,” Júlio esplika.
Nia informa, se halo konstrusaun foun ne’e kabe bá iha Diresaun Unidade Jestaun Projetu mak ko’alia kona-ba konstrusaun foun, tanba ne’e, daudaun ne’e prosesu aprovizionamentu la’o hela, depois semana ne’e ka semana oin prosesu aprovizionamentu loos ona bele implementa ona servisu.
“Husi ita-nia levantamentu, ne’ebé ita haree prioridade mak Munisípiu Manatutu, Ermera, Bobonaru, Lautein, Vikeke no kada munisípiu sira-ne’e ita foti sentru saúde ida hodi halo reabilitasaun, tanba ita mós haree ba ita-nia orsamentu ne’e rasik,” nia dehan.
Husi totál orsamentu rihun $350 ne’e, Júlio tenik, tékniku sira mak hatene kada sentru saúde gasta orsamentu hira.
“Ita sei identifika ba sentru saúde hitu no mós postu saúde haat, entaun totál hamutuk 11 husi munisípiu sira-ne’ebé mak ohin ha’u dehan ne’e. Kada munisípiu ita foti sentru saúde no postu saúde ida,” nia konklui.
Jornalista: Felicidade Ximenes
Editór: Xisto Freitas da Piedade
