KOVALIMA, 11 Abríl 2025 (TATOLI) – Prezidente Autoridade Munisípiu Kovalima, Miguel Armada Cardoso, sesta-ne’e, hala’o diálogu kona-ba karta husi Komisaun Anti Korrupsaun (KAK) husu dirijente sesante no atuál atu deklara riku-soin.
“Hanesan autoridade iha Kovalima, relasiona akontese erru foin lalais funsionáriu públiku sira organiza malu hodi hala’o konferénsia ba imprensa iha resintu administrasaun, iha oras servisu tanba la satisfas kona-ba karta husi KAK husu atu deklara riku-soin”, Miguel Armada Cardoso haktuir ba jornalista sira, iha salaun AMC, ohin.
Razaun dirijente sesante sira hala’o konferénsia tanba KAK haruka karta atu deklara riku-soin maibé sira la asesu informasaun.
Ho nune’e autoridade Kovalima esplika, hafoin PAM simu karta husi KAK, PAM hatuun kedas despaixu ba diretór administrasaun Rekursu Umanu atu kontinua pasa informasaun ba dirijente atuál atu fó hanoin ba funsionáriu sira maibé dirijente servisu munisipál la enkamiña informasaun ba dirijente sesante sira.
“Tanba la pasa informasaun hamosu problema ohin liuhusi diálogu ida-ne’e dirijente sesante sira na’in-139 klarifika no rekoñese katak ita hotu nia erru katak ho nune’e ita ko’alia konsege hetan nia solusaun”, nia informa.
Ho nune’e ba futuru bainhira despaixu PAM dirijente sira la informa informasaun nia parte sei orienta ba diretór fiskalizasaun atu fiskaliza.
Administradór Postu adiministrativu Suai sesante, Luzino do Rego, apresia PAM maibé nafatin konsidera katak diálogu ne’e tarde ona.
“Razaun tarde tanba prosesu ami na’in-139 hetan ona sansaun inflasaun husi KAK tuir loloos la iha problema KAK submete karta maibé ami la asesu informasaun tanba ne’e mak ami la satisfas”, nia dehan.
Karta mai iha 08 janeiru 2025 hatete katak solisita ba PAM atu nota informativa ba deklarante vinkuladu atu kumpri prazu ne’ebé KAK fó durante fulan tolu.
“Deklarante ne’ebé arolado no rejista ona signifika ami sesante ne’e arolado no rejistadu tanba karta ne’e informa mós ba ami inklui ba dirijente atuál sira rejista iha sistema DRBI maibé realidade informasaun ida ami la asesu nune’e ami sai vítima”, nia konsidera.
Antigu autoridade ne’e rekomenda, ba futuru, atu diretór sira presiza intende didi’ak kontéudu nune’e labele hamosu konfuzun hodi funsionáriu sira sai vítima.
Jornalista:Celestina Teles
Editór: Rafael Ximenes de A. Belo
