KOVALIMA, 11 Abríl 2025(TATOLI) – Ministériu Komérsiu Indústria (MCI), sesta ne’e, atribui sertifikadu ba vendedór na’in-25 ne’ebé tuir formasaun durante loron haat kona-ba Jestaun estratéjia negósiu, iha munisípiu Kovalima.
“MCIA liuhusi Departamentu Merkadu labele fasilita de’it formasaun hodi hasa’e sira-nia koñesimenentu maibé presiza mós atribui sertifikadu hanesan parte iha atu motiva vendedór sira nune’e sira bele esforsu atu bele kompete halo negósiu iha merkadu ”, Xefe Departamentu lisensiamentu no kadastru MCI, Adelia Miguel do Rego Fernandes de Araújo dehan ba jornalista hafoin ensera formasaun ba vendedór sira iha salaun IADE Kovalima, ohin.
MCI atribui sertifikadu hanesan motiva vendedór sira, tanba ne’e nia promete atu kontinua fasilita formasaun ba vendedór sira ne’ebé mak seidauk konsege tuir formasaun kona-ba Jestaun estratéjia negósiu.
Formasaun ne’e hala’o durante loron haat; hahú iha 08 to’o loron 11 Abríl, ho nia tema Kapasitasaun vendedór kona-ba jestaun estratéjia negósiu: Mai ita hasa’e koñesementu hodi bele dezenvolve liutan ita nia ekonómia rai laran.
Labele lakon oportunidade halo kompetisaun
Nia dehan, MCI liuhusi Departamentu merkadu atribui sertifikadu tanba vendedór sira ne’e tuir ona formasaun kona-ba Jestaun estratéjia negósiu durante loron haat nune’e hasa’e vendedór sira-nia koñesementu.
“Ami husi Departamentu Markadu fasilita kapasitasaun ba iha vendedór nune’e sira bele esforsu labele lakon oportunidade atu halo kompetisaun ho sidadaun estranjeiru halo negósiu iha ita-nia rai laran rasik”, nia dehan.
Iha ámbitu formasaun, vendedór sira mós hato’o sira-nia preokupasaun kona-ba vendedór fa’an iha merkadu maibé ema la sosa sira-nia sasan.
Iha sorin seluk, Diretora MCI Munisípiu Kovalima, Bernadete de Jesus Inacia konfirma katak iha atividade kapasitasaun ne’e, vendedór sira menus partisipasaun nune’e garante iha futuru sei atrai liután sira atu bele partisipa ho másimu iha atividade hanesan ne’e.
“Ami entrega konvite maibé vendedór sira hato’o sira-nia preokupasaun dehan okupadu hodi hala’o sira-nia atividade negósiu. Sira-nia partisipasaun ladun másimu oinsá mak uza maneira hodi atrai vendedór sira”, nia informa.
Atividade kapasitasaun vendedór, fó prioridade ba vendedór oinsá sira bele hasa’e sira-nia ekonomia família.
Jornalista: Celestina Teles
Editór: Rafael Ximenes de A. Belo
