VIKEKE, 12 Abríl 2025 (TATOLI)—Espasu ba Postu Saúde Suku Maluru, Postu Administrativu Vikeke Vila, Munisípiu Vikeke, kloot hodi difikulta pesoál saúde fó atendimentu ba pasiente sira.
Pesoál Saúde Postu Maluru, Etelvina Pereira Martins, hateten kondisaun Postu Saúde Maluru kloot tebes-tebes, tan ne’e bainhira pasiente barak mai konsulta fatin la sufisiente.
“Ami-nia fatin ne’e kloot liu. Kuandu ita-nia komunidade mai konsulta barak, fatin difikulta ami hodi fó tratamentu tanba fatin mak la sufisient. Depois, postu saúde ne’e kle’ur ona, ne’ebé kondisaun uma mós fíziku ladún di’ak,” Etelvina ba TATOLI, iha Postu Saúde Maluru, sábadu ne’e.
Etelvina sente teriste haree kondisaun postu saúde referida, tan ne’e solista haluan tan espasu hodi fasilta pesoál saúde atende pasiente sira.
“Ami-nia sala emerjénsia iha kama ida, sala parteira kama ida no sala atendimentu ida, tan ne’e ami haree fatin la to’o. Moras emerjénsia barak entaun pasiente balun tenke túr de’it hodi hein. Ne’e duni, ami husu ba autoridade sira presiza aumenta espasu ruma ba ami hodi atende ita-nia komunidade,” nia hato’o.
Etelvina haktuir, Postu Saúde Maluru kada loron fó asisténsia ba pasiente na’in-19 to’o na’in-20 resin, pesoál saúde ka enfermeiru na’in-rua no laiha parteira.
Iha biban ne’e, Xefe Suku Maluru, Bendito Soares, rekoñese kondisaun Postu Saúde Maluru kloot, iha-ne’ebé durante ne’e sai preokupasuan ba pesoál saúde no komunidade Maluru.
“Ita-nia postu saúde ne’e la’os atende de’it komunidade Maluru, maibé atende mós komunidade Suku Uma Uain Leten. Ami sei tau ba planu tinan 2026 hodi konstrui postu saúde,” nia informa.
Iha parte seluk, Prezidente Autoridade Munisipál Vikeke, Francisco Cruz Simões de Gonzaga Soares, hateten, kona-ba Postu Saúde Maluru ne’ebé kloot, sujere autoridade Suku Maluru tau iha planu prioridade suku hodi aprezenta ba postu, depois aprezenta ba Konsellu Konsultivu hodi haree asuntu infraestutura sira-ne’e.
“Ha’u mós sei orienta Planeamentu Dezenvolvimentu Integradu Munisipál (PDIM) hodi haree asuntu ida-ne’e. Tanba ida-ne’e sai mós prioridade ba ita-nia komunidade iha Suku Maluru,” nia hato’o.
Tuir dadus, populasaun Suku Maluru hamutuk 1.245, mane 635, feto 610, totál uma-kain hamutuk 301. Suku Maluru iha aldeia tolu kompostu husi Aldeia Maluru, Makaloso no Loho Oan.
Jornalista: Vitorino Lopes da Costa
Editór: Xisto Freitas da Piedade
