DILI, 13 Abríl 2025 (TATOLI)—Primeiru-Ministru (PM), Kay Rala Xanana Gusmão ho delegasaun, domingu ne’e, hala’o vizita ofisiál bá Provínsia Hunan, Repúblika Populár Xina, hahú husi 13-17 Abríl 2025, ho objetivu atu estabelese relasaun kooperasaun ne’ebé mak amigável entre nasaun rua ne’e.
Atividade vizita ofisiál ne’ebé sei hala’o husi Xefe Governu nian durante estadia iha Xina mak hanesan sei hasoru-malu ho Governadór Provínsia Hunan, Mao Weiming, sei hato’o Palestra públika iha Auditóriu Universidade Hunan, vizita bá Parke Industriál Zhuzhou Beidou, vizita bá Sentru Internasionál Expozisaun Fogu Artifísiu iha Liuyang Qingtai, vizita Zoomlion Smart Industriál City no vizita bá Royal Group Hunan Youshi Dairy Co. Ltd.
Governu Timor-Leste estabelese ona kooperasaun amigável ho Provínsia Hunan (Xina) durante tinan 11 ona, hodi dezenvolve programa kooperasaun iha área oinoin, hanesan turizmu, interkámbiu kulturál, edukasaun, agrikultura no akikultura, liuliu ho Autoridade Munisipál Manatutu.
Durante kooperasaun ne’e la’o, Autoridade Provínsia Hunan halo doasaun ekipamentu agríkola, hanesan tratór no materiál edukativu sira bá Eskola Sekundária Públika Kay Rala Manatutu, foka liu kompromisu kontinua bá dezenvolvimentu sustentável no fortalesimentu relasaun bilaterál.
Populasaun Manatutu mós konsege aprende barak kona-ba téknika no esperiénsia ne’ebé Autoridade Provínsia Hunan oferese atu esplora posibidade foun no promove progresu ekonómiku lokál.
Aleinde ne’e mós iha loron 03 fulan Abríl 2025, semana kotuk, Repúblika Popular Xina liuhusi Provínsia Hunan, apoiu doasaun unidade karreta ambulánsia, ho objetivu atu fortaleza relasaun amizade no kooperasaun entre Governu Xina no Timor-Leste, hodi kontribui ba dezenvolvimentu setór saúde iha Timor-Leste. Ho ida-ne’e atu esforsu no hadi’a kualidade atendimentu saúde ba populasaun Manatutu.
Jornalista: Alexandra da Costa
Editór: Xisto Freitas Piedade
