VIKEKE, 13 Abríl 2025 (TATOLI)—Selebrante Misa Domigu Ramos, Pe. Heriberto Soares Pedro, SVD, husu sarani Postu Administrativu Uatulari, Munisípiu Vikeke, presiza sai ema Kristaun Katólika ida di’ak iha tempu kuarezma no páskua.
“Tempu ramos ne’ebé sarani katóliku loke sai odamatan kuarezma ka páskua nian. Tanba ne’e, ita sarani presiza sai hanesan ema Kristaun Katólika ida-ne’ebé di’ak, hodi aprende Jezus ne’ebé fó ninia aan ba mate iha Ai-krúz Santu hodi salva ema hotu nian sala, hatudu ninia aan loloos hanesan profeta salvasaun,” Pe. Heriberto hateten liuhusi ninia omília iha selebrasaun Misa Domingu Ramos, iha Igreja Parókia Uatulari.
Padre subliña Jezus ninia prezensa sai hanesan ahi-oan ida-ne’ebé kontinua hamoris filafali sentimentu kontente, otimizmu no ksolok moris nian husi sarani sira hotu, hodi deskobre filafali futuru nu’udár jerasaun David nian.
“Tan ne’e, ita haree husi lideransa Judea sira-nian, sira haree situasaun sira-ne’e nakonu ho deskonfiansa, ódiu no vigansa, konsensu ne’ebé negativu ba Jezus ninia prezensa. Observa husi lideransa Judea sira katak Jezus la’ós profeta ida mai lori promesa salvasaun nian, maibé Jezus hanesan ema bulak, ema ne’ebé mak ki’ik no ikus sira dehan Jezus hanesan líder Rebelde ne’ebé maihusi sidade Nazaré atu destroi sosiál, polítika no relijiozu nian,” nia haklaken.
Tanba ne’e, Amu Heriberto dehan, reflesaun ba Domingu Ramos pontu importante tolu ne’ebé deskreve Jezus ninia prezensa iha altura ne’ebá, ne’ebé fó vantajen ba sarani sira to’o oin loron, mak moris relijiaun, sosiál no polítika ne’ebé mós dalaruma muda realidade ema-nian.
Ikus, nia husu sarani sira atu moris nu’udár kristaun fiar nian, moris relijiaun, sosiál, polítika, hatudu maturidade fiar hanesan simu bensaun Jezus nian no hakilar lian maka’as Osona-Osana, viva Liurai David nia oan ho ai-tahan ramos iha sarani sira-nia liman.
Entretantu, selebrasaun Misa Domingu Ramos ne’e partisipa másimu husi sarani Uatulari, autoridade lokál sira no hetan seguransa husi Polísia Nasionál Timor-Leste (PNTL) Eskuadra Postu Uatulari.
Jornalista: Vitorino Lopes da Costa
Editór: Xisto Freitas da Piedade
