MANATUTU, 14 Abríl 2025 (TATOLI)—Ministru Petróleu Rekursu Minerál (MPRM), Francisco Monteiro, hateten Projetu Refinaria, Petro-Kímika no Planta LNG ne’ebé atu estabelese iha Natarbora sei kontinua iha faze negosiasaun ho Austrália.
“Projetu Refinaria, Petro-Kimíka no Planta LNG sei iha faze negósiasaun nia laran maibé ita halo hela dezeñu tékniku lubuk ida. Parte ida, atu kria kondisaun infraestrutura nesesáriu ne’e mak ita presiza implementa Suai Suplay Base ne’e,” Ministru Francisco hateten ba jornalista sira iha Natarbora, sábádu (12/04) ne’e.
Maske sei iha faze negósiasaun, mia dehan, servisu kontinua la’o másimu hela tanba sei envolve investór internasionál sira.
“Servisu kontinua la’o hela tanba Projetu Refinaria, Petro-Kimíka no Planta LNG sei envolve investór internasionál sira inklui ita konvense Austrália no empreza sira-ne’ebé halo operasaun iha tasi Timor,” Ministru ne’e hateten.
Antes ne’e, iha loron 11 fulan-Janeiru 2025, Primeiru-Ministru IX Governu Konstitusionál, Kay Rala Xanana Gusmão konsidera Natarbora iha espasu no fatin hodi sai sentru ba produsaun mina no gás iha future, tanba Natarbora iha rai ho espasu luan hodi hala´o projetu boot hirak ne´ebé define iha Kosta Sul.
Maibé, antes ne’e mós Governu deside atu hala’o iha suku Beaço, munisípiu Viqueque maibé haree ba espasu ho rai ne’ebé insufisiente no rai hirak ne’e komunidade okupa hela, entaun ikusmai halo estudu foun no define Natarbora sai sentru ba projetu planta gás naturál likifeitu (LNG, sigla inglés), refinaria, petro-kímika ne’ebé sei konsentra iha postu administrativu Barique/Natarbora, munisípiu Manatutu.
Natarbora oferese rai kuaze ektare 3.000 hodi hala´o projetu hirak ne´e kompara ho Beaço espasu la sufsiente hodi implementa projetu ne’e, nune’e buka fatin seluk no identifika Natarbora sai hanesan sentru ba projetu LNG iha futuru mai.
Relasiona ho implemetasaun projetu LNG, refinaria no petro-kímiku, Primeiru-Ministru tuun direta iha terrenu hodi observa rai hirak ne’ebé komunidade oferese hodi hala´o projetu hirak ne’e no hatudu rai ho espasu ne’ebe luan atu implementa projetu ne’e.
Antes ne’e, Governu deside ona fatin tolu hanesan Suai, Betano no Natarbora hola parte ba projetu Kosta Súl no Governu kontinua iha kompromisu atu dudu prosesu hotu bele sai hanesan pontu ba empreza ne’ebé hakarak investe iha Greater Sunrise, no esplorasaun sira seluk kona-ba mina no gás iha tasi-laran no rai-maran.
Jornalista : Hortencio Sanchez
Editór : Cancio Ximenes
