DILI, 14 Abríl 2025 (TATOLI)—Vise-Ministru asuntu Parlamentár, Adérito Hugo da Costa, hateten, Governu akompaña hela introdusaun ba tarifa iha Estadu Unidu Amérika (EUA).
“Governu tau hela atensaun ba ida-ne’e hamutuk ho entidade relevante Ministériu Finansa, haree akompaña ho didi’ak impaktu husi tarifa, mezmu ita-nia persentajen introdús mai Timor esportasaun 10%,” governante ne’e hato’o hodi responde Deputadu sira-nia preokupasaun iha reuniun plenária Parlamentu Nasionál (PN), segunda ne’e.
Nia nota, país sira hanesan Indonézia no seluk tan ne’ebé Timor importa sasán, sira hetan hotu impaktu husi desizaun hasa’e aplikasaun taxa importasaun ba Amérika.
“Ita sei haree ninia dinámika no nia impaktu iha prósimu fulan-tolu no hitu ou prósimu ano husi impaktu loloos husi tarifa,” nia akresenta.
Notísia relevante : Timor-Leste akumula valór importasaun millaun $92 iha outubru 2024
Governu Timor-Leste akompaña hanesan mós Governu husi nasaun seluk mós halo analiza no akompaña didi’ak saida mak tenke halo banhira iha impaktu tarifa ba merkadu komersiál.
“Timor-Leste ita iha esperiénsia presu ai-hán sa’e iha tinan 2008-2009 ho intervensaun ne’ebé Governu iha tempu ne’ebá, halo intervensaun merkadu atu fó kondisaun mínimu ba ita-nia populasaun, ba kapasidade kompra foos ho folin baratu. Timor-Leste iha esperiénsia ba senáriu saida de’it mak sei akontese Governu kontinua analiza hodi haree kualkér impaktu ne’ebé iha Estadu bele iha intervensaun,” nia tenik.
Deputada Bankada Governu husi CNRT, Virgina Anabelo, koloka kestaun impaktu Prezidente Donal Trump hasa’e tarifa importasaun.
“Ha’u hakarak ko’alia ituan kona-ba asuntu impaktu husi polítika Amérika ka Trump nian ba ita-nia Estadu, husu took Governu ninia preparativu mezmu perturbasaun ba ekonomia globál ne’e ninia intensaun ne’e ba liu Xina ho Europa, nasaun ki’ik ladún hetan boot, maibé haree ita nafatin nia impaktu,” nia katak.
Deputada ne’e hatutan, Timor-Leste depedénsia ba Fundu petrolíferu no reseita doméstika ki’ik, tanba ne’e oinsá Governu liuhusi liña ministeriál bele haree preparasaun hodi enfrenta situasaun sira iha tempu oin mai.
Jornalista : Nelson de Sousa
Editora : Julia Chatarina
