VIKEKE, 14 Abríl 2025 (TATOLI)—Ministra Saúde, Élia António de Araújo dos Reis Amaral, husu profisionál saúde sira iha munisípiu Vikeke atu halo atendementu ba populsaun sira iha Vikeke ne’e tenke ho fuan no domin.
“Ha’u husu ba pesoál saúde sira tenke atende ita-nia populasaun sira iha Vikeke ho fuan no domin, atu nune’e bele fó forsa ba ita-nia populasaun sira. Ho domin ne’ebé atensaun hodi kura duni populsaun sira-nia moras. Ita presiza hatudu ita-nia domin ba populsaun sira iha Vikeke, ita Vikeke rasik mak kuidadu fila-fali ba ita-nia komunidade,” Ministra saúde, Élia António de Araújo dos Reis Amaral, hateten ba jornalista sira iha Beloi, ohin.
Governanete ne’e sujere, pesoál saúde sira labele tau de’it liman iha bolsu, labele servisu to’o de’it iha tuku 12h00 tanba pesoál saúde sira hatais bata mutin ne’e atende ba ema moras sira.
“Se populsaun sira iha Vikeke di’ak de’it, ita-boot sira (pesoál saúde) laiha funasaun hodi hatais bata mutin. Tan ne’e, uza bata mutin atende ba ita-nia populasaun sira-ne’ebé moras presiza ita-nia tulun,” nia fó hanoin.
Nia hateten, iha fasilidade saúde sira mak iha estudante estajiáriu iha pesoál saúde seniór sira tenke fó briefing ba estudante sira, molok ba halo atendementu ba populasaun sira maibé tenke akompaña sira.
“Karik iha fasilidade saúde sira Vikeke iha estajiáriu, favór fó briefing ba sira no akompaña sira nafatin, atu labele husi sira mesak. Nune’e, pesoál saúde seniór, junior, estajiáriu sira presiza tau liman hmutuk liuliu ba enfermeiru sira-ne’ebé iha esperénsia tenke fahe matenek ba malu,” nia hateten.
Tanba ne’e, nia prefere pesoál saúde Vikeke tenke servisu atendementu di’ak ba populasaun sira no husu pesoál saúde labele hanoin halimar telemovél, iha tempu halo atendementu ba pasiente sira.
Enkuantu, tuir dadús pesoál saúde servisu iha fasilidade saúde sira postu saúde, sentru saúde, internamentu iha munisípiu Vikeke totál hamutuk na’in-402, kompostu husi médiku, enfermeiru, parteira, farmasia, dentaria, laboratóriu, seguransa, Cleaner ne’ebé duranrte ne’e ativu fó atendementu ba komunidade sira iha Vikeke.
Servisu Saúde Vikeke menus rekursu médiku
Entretantu, Diretór servisu saúde munisipál Vikeke, Aljacsono S. Maia, informa Servisu saúde munisipál Vikeke daudaun ne’e menus rekursu liuliu ba área mediku ba atendementu abitante sira iha munisípiu Vikeke.
“Ita-nia rekursu área mediku hamutuk na’in-35, maibé na’in-rua muda ba Dili, na’in ida ba tiha eskola iha Kuba. Nune’e médiku ne’ebé iha munisípiu Vikeke hela na’in-32, ita menus liu ba rekursu pesoál médiku,” Aljacsono S. Maia hateten ba jornalista sira iha Internamentu, Beloi, ohin.
Kona-ba rekursu, Aljacsono dehan, Servisu Saúde munispál Vikeke halo ona pedidu ba diretór nasionál korporativu husi Ministériu Saúde hodi koloka fila-fali mediku ba fatin mamuk sira hodi halo atendementu ba abitante sira.
“Ami halo ona pedidu ba nasionál hodi subtitui ba mediku sira-ne’e ba nasionál no ba eskola sira nian fatin. Ita iha Vikeke postu saúde 43 no postu balu médiku laiha, ne’ebé ita presiza médiku na’in-50 hodi koloka ba postu saúde sira. Menus médiku ne’e ita-nia diretór korporativu mós hatene,” nia dehan.
Hatán ba preokupasaun ne’e, Ministra Saúde, Élia António de Araújo dos Reis Amaral, hateten daudaun ne’e Ministériu Saúde halo mapeamentu hotu hafoin bele koloka médiku ba fatin sira-ne’ebé menus médiku.
“Kona-ba menus médiku agora daudaun ami halo hela mapeamentu ba mediku sira-ne’ebé ba foti área espesialidade iha Kuba no iha rai seluk. Entaun, ita presiza halo mapeamentu ida hodi identifika no ami mós simu informasaun husi Ministériu ensinu superiór katak ramata estudu ba área médiku, enfarmajén no parteira hamutuk 5000, ne’ebé ita sei haree oinsá integra sira ba munisípiu sira-ne’ebé presiza,” nia dehan.
Jornalista : Vitorino Lopes da Costa
Editór : Cancio Ximenes
