DILI, 14 Abríl 2025 (TATOLI)–Deputadu Bankada Opozisaun husi FRETILIN, Dário Madeira, husu ba entidade kompetente atu mellora atendimentu ba pasiente sira bainhira hala’o tratamentu saúde iha Hospital Nacional Guido Valadares (HNGV).
“Horikalan virál loos iha HNGV ema profisionál saúde kuaze laiha ospitál laran, estudante estajiáriu sira mak iha ne’ebá, sira ba liga soru ne’e la hatene taka, husik hela ran suli, pasiente horikalan mate iha ospitál ne’ebá. Ita-nia serbisu ne’e atu fó prestasaun ba povu, serbí ba,” Deputadu levanta liuhusi reuniaun plenária, Parlamentu Nasionál (PN), segunda ne’e.
Iha fatin hanesan, Deputada Bankada Opozisaun husi PLP, Maria Angelina Sarmento, preokupa ho situasaun ne’ebé akontese horiklan iha ospitál nasionál, katak iha estajiáriu balun mak halo atendimentu ba pasiente ida hodi hasai ran atu halo teste molok atu halo operasaun.
“Atendimentu ne’ebé sala, kauza pasiente refere nia ran sai hotu no ikus liu nia hakotu iis, ida-ne’e grave tebes tanba ita halimar ho povu nia vida, labele tolera beibeik hahalok dezumanu sira tanba grave totál,” nia aktak.
Notísia relevante : Primeiru-Ministru Orienta Hadi’a Atendimentu iha HNGV
Deputadu Bankada Opozisaun husi KHUNTO, Luís Roberto, husu ba Komisaun F iha PN ne’ebé trata asuntu Saúde, Igualidade Jéneru no Inkluzaun Sosiál atu tun iha terrenu hodi halo fiskalizasaun nune’e bele hatene loloos kestaun referidu hodi haree prestasaun serbisu profisionál saúde ne’ebé fó atendimentu di’ak ba pasiente.
Nia mós husu ba Ministériu Saúde atu fó atensaun hodi mellora atendimentu pasiente iha fasilidade saúde hotu.
Hatán ba preokupasaun hirak ne’e, Reprezentante Governu liuhusi Vise-Ministru asuntu Parlamentár, Adérito Hugo da Costa, rejista preokupasaun ne’e no sei hato’o ba ministériu tutela tanba iha Ministra Saúde no Vise Ministru na’in-rua atubele fó resposta, tanba ne’e kestaun tékniku, nune’e detallu liu sira mak bele esplika.
“Esplikasaun bele mai iha komisaun no plenária depende ba Deputadu sira halo konvokatóriu,” nia hato’o.
Jornalista : Nelson de Sousa
Editora : Julia Chatarina
