KOVALIMA, 14 Abríl 2025 (TATOLI) – Padre Pároku Igreja Nossa Senhora de Fátima Suai, Amu Aderito da Costa Vilar Morreira, husu ba sarani sira iha munisípiu Kovalima atu selebra festa Páskua ho dame.
Molok sarani Kátolika atu selebra festa Páskua, sarani sira hahú ho Kuarta-feira Sinza, nune’e durante iha Kuarezma hodi halo preparasaun, rekollesaun no konfesa, jejun, abstinénsia no karidade hodi hametin relasaun di’ak ho Na’i maromak ho maluk sira seluk nune’e meresa sai sarani di’ak.
“Ho fenómenu la’o iha ita-nia sosiedade nune’e halo ita-nia sarani sira bilin-bala. Maibé hanesan fiar-na’in, ita-nia figura úniku mak Jesus Kristu de’it atu lori fahe ba ema seluk ba dalan Maromak nune’e presiza pás no hadame malu, ho ita-nia aan. Ha’u-nia aan dame no hanesan sarani loos ka la’e”, Padre Aderito da Costa Vilar Morreira dehan ba jornalista sira, iha nia rezidénsia Suai, ohin.
Líder Igreja pároku Kovalima ne’e dehan, sarani Katólika hela de’it loron tolu atu selebra ona loron boot festa Páskua maibé importante mak presiza moris iha pás no unidade; labele atu buka provoka malu hodi hamosu problema!
“Ho Jesus Kristu nia mate no moris hias bele tulun ita halo ita moris foun ho ideia inovativu, konsiénsia foun nune’e bele sai figura Kristu iha rai, bele lori dame no unidade ba ita-nia sosiedade”, Na’i-lulik ne’e fó hanoin.
Tanba ne’e hanesan sarani Katólika, atu hakat tama ba iha semana santa, selebra loron boot festa Páskua, sarani presiza mós halo preparasaun espirituál hodi simu Jesus Kristu ho laran moos.
Iha sorin seluk, Prezidente Autoridade Munisípiu Kovalima, Miguel Armada Cardoso reforsa, komunidade sira presiza selebra festa páskua ho hakmatek no hala’o jejun nune’e inan-aman presiza eduka oan sira.
“Ita presiza jejun nune’e ita simu Páskua ho fuan no laran tanba ne’e inan-aman sira presiza eduka nia oan sira atu labele kria problema durante selebra loron boot festa Pásku iha munisípiu Kovalima”, autoridade ne’e apela.
Jornalista: Celestina Teles
Editór: Rafael Ximenes de A. Belo
