DILI, 14 Abríl 2025 (TATOLI)—Xefe Departamentu Investigasaun Kriminál Nasionál (DIKN), Superintendente Polísia João Belo dos Reis, hateten iha sesta (11/ 4), Polísia Nasionál Timor-Leste (PNTL) hetan kontatu husi parte Alfándega hodi halo apreensaun ba kontentór 20 fit husi Kambódia tanba alegadamente iha sasán kontra-bandu balun iha-ne’ebá.
“Nune’e, Investigasaun Kriminál aproxima no identifika katak kontentór referidu ho lisensa ho item ne’ebé mak nia atu hatama ne’e tisu, maibé iha-laran sigaru hamutuk kaixa 420 mak ita deteta. Nune’e, Polísia Nasionál Timor-Leste liuhusi Departamentu Investigasaun Kriminál halo kedas prosesu no ohin ita prepara atu hato’o bá Ministériu Públiku,” João hateten ba jornalista sira iha nia kna’ar fatin, Komandu Jerál PNTL, Kaikoli, segunda ne’e.
Nia dehan, kazu ida-ne’e PNTL asegura suspeitu na’in-rua ho inisiál MP no DTX ne’ebé alegadamente hatama sasán kontra-bandu ne’e husi Kambódia mai Timor-Leste.
Suspeitu sira-ne’e viola artigu 277 kona-ba burla agravadu, artigu 303 falsifkasaun dokumentu no anotasaun téknika nian, artigu 314 kona-ba fraude fiskál, artigu 315 kona-ba bem merkadu no importasaun, artigu 314 kona-ba dezkamiñu no artigu 316 kona-ba kontra-bandu, husi Kódigu Penál Timor-Leste.
Belo esplika, sigaru illegál ho kaixa 420 ne’e, iha kada kaixa iha masu (slop) 50. Kada masu 50 ne’e iha lolon 21.00 no tuir kalkulasaun iha masu hamutuk 200.000.
Ho hahalok arguidu sira-nian ne’e, hamosu prejuizu ba Estadu hamutuk $100.00 tanba la selu taxa bá Estadu.
Komandante João Belo, esplika kontentór ne’ebé maihusi Kambódia, sasán sira-ne’ebé iha kontentór ne’e suspeitu sira halo falsifikasaun bá iha sasán tanba sigaru ne’ebé polísia halo apreensaun ne’e nia falun no dokumentu sira kona-ba sasán tama ne’e la justifika kona-ba saúde, liuliu ba sigaru ne’e nikotin hira ne’e la justifika iha-laran.
Nia dehan, tuir loloos ne’e sasán ka item sira-ne’ebé mak atu importa mai buat hotu deskreve ona iha lista no buat sira-ne’e tenke selu taxa.
“Tanba ne’e mak sistema Portu Tibar deteta. Ita-boot sira hatene, sistema ne’ebé mak instala iha Portu Tibar ne’e rigorozu uitoan no kuandu kontentór ne’e tama iha sinál mean mosu iha kontentór ne’e. Tanba ne’e, Alfándega kontatu kedas polísia halo apreensaun ba kontentór ne’e,” Belo haktuir.
Nia tenik, polísia labele halo intervensaun direta iha atividade Alfándega, maibé kuandu iha kontatu husi Alfándega mak polísia sei halo intervensaun.
“Ba ida-ne’e ami agradese tebes bá Alfándega tanba sira deteta kontentór tama iha liña mean. Sira deteta katak iha buat ruma laloos no liga mai polísia halo kedas intervensaun,” nia konklui.
Jornalista: Natalino Costa
Editór: Xisto Freitas da Piedade
