KOVALIMA, 14 Abríl 2025 (TATOLI) – Servisu Rejistrasaun no Verifikasaun Emprezariál, Institutu Públiku (SERVE,I.P) sukursál Kovalima, kontribui ona reseita ho montante $ 4,753,50 ba kofre Estadu.
“Hahú Janeiru –Marsu, ita nia atendementu hanesan baibain ba kliente ne’ebé mak ita halo rejistu. Rejistu ho tipu negosiante hanesan empreza, Novu rejistu 82, renovasaun 128, no alterasaun aumenta hamutuk 36; ne’ebe atividade la’o di’ak tebes”, Koordenadór SERVE, I.P, Sukursál Kovalima, Domingos Gavrila Amaral, relata ba jornalista iha kampung baru, ohin.
Ho nune’e, nia informa katak atividade ne’ebé mak SERVE ,I.P hala’o durante trimestre ba dahuluk – Janeiru to’o Marsu, tinan ne’e, hodi bele kontribui ona reseita hamutuk $ 4,753,50 ba kofre Estadu.
Reseita ne’ebé SERVE.I,P kontribui mai husi rejista tipu negósiu sira rejista negosiante no emprezáriu sira hamutuk 246. Husi númeru ne’e, ho tipu negosiante Enin, Unipesoál Lda, Lda, Empreza Públiku (E.P), Sosiedade Anonima (SA) no Reprezenta Permanente (RP).
Tipu negósiu Enin hamutuk 145 ne’ebé kompostu husi novu rejistu 66, renovasaun 70, alterasaun aumenta atividade sia. Tipu negósiu empreza hamutuk 93; husi númeru ne’e fahe tipu negósiu hanesan Unipesoál Lda, Novu rejista 15, Renovasaun 54, alterasaun aumenta atividade 24.
Tipu negósiu Lda hamutuk hitu mak hanesan tipu negósiu novu rejistu ida, renovasaun haat, alterasaun aumenta atividade rua, tipu negósiu empreza públika la iha, Sosiedade Anonima (SA) tipu negósiu alterasaun aumenta atividade ida no Reprezenta Permanente (RP) la iha.
SERVE,I.P Kovalima hasoru difikuldade
Ho atividade atendementu nune’e SERVE,I.P sukursál Kovalima hasoru difikuldade mak bainhira halo rejistu novu, tanba tuir nia, prosesu durante loron tolu empreza sira hetan fotokopia maibé orijinál presiza atu hetan autentikasaun ba dokumentu presiza lori ba nasionál ho razaun konseladór munisípiu iha nasionál.
“Tuir loloos semana ida rua bele foti ona orijinál tanba konseladór iha nasionál entaun ami presiza halibur barak mak foin bele lori ba hodi hetan autentikasaun. Nune’e, ita koko halo aprosimasaun ho Diretór ezekutivu koordena ho Ministériu Justisa (MF) tau konseladór iha sentrál hanesan iha munisípiu Ainaro bele fasilita munisípiu sira hanesan, Ainaro, ManuFahi no Kovalima”, nia rekomenda.
SERVE ,I.P Sukursal Suai nafatin fó hanoin ba sidadaun ne’ebé hala’o atividade negósiu iha Kovalima presiza mai halo rejistu iha SERVE,I.P hodi hetan legalidade nune’e bele iha dokumentu legál hanesan lisensa negósiu bainhira lisensan espira ona bele halo renovasaun, labele hein inspesaun foin halo renovasaun.
Jornalista: Celestina Teles
Editór: Rafael Ximenes de A. Belo
