VIKEKE, 15 Abríl 2025 (TATOLI)—Xefe suku Uabubu, postu administrativu Ossú, munisípiu Vikeke, Jacinto M. A da Cruz, husu Governu Konstituisinál da-sia (iX) konstrui postu saúde iha suku Uabubu hodi abitante sira asesu.
“Ami-nia preokupasaun ba konstrui postu saúde kuaze tinan barak ona, maibé to’o agora Governu seidauk responde. Tanba ne’e, ami hakarak husu ba Ministériu Saúde bele konstrui ona ami-nia postu saúde hodi ami-nia komunidade Uabubu bele asesu tratamentu moras sira-ne’e,” Jacinto M. A da Cruz hateten ba Agência Tatoli, iha postu Ossú, ohin.
Tuir xefe suku Uabubu, hahú husi tinan 2011 to’o mai agora postu saúde ba suku Uabubu laiha, nune’e komunidade Uabubu mak oferese sira-nia uma hodi pesoá saúde sira uza ba atendementu saúde ba komunidade iha suku refere.
“Postu saúde laiha ha’u rasik mak oferese ha’u-nia uma ida ba pesoál saúde sira, uza hodi atende ba ita-nia komunidade Uabubu. Kada tinan, ami-nia planu prioridade suku ami aprezenta beibeik ba postu, maibé la pasa. Tan ne’e, ha’u prefere ba MS bele tau planu hodi konstrui rai ami oferese ona ho medida 30 x 40 entrega ona ba parte saúde,” nia hateten.
Aleinde ne’e, nia relata, daudaun ne’e destaka pesoál saúde iha suku Uabubu hodi halo atendementu ba komunidade Uabubu, maibé pesoál saúde ne’e rasik la hela suku Uabubu hela iha Ossú vila mak ba tratamentu iha suku.
“Ita ko’alia kona-ba destakamentu pesoál saúde iha suku ne’e hela iha suku hodi fó tratamentu, maibé ami-nia pesoál saúde enfermeria ida-ne’e hela iha Ossú Vila mak mai halo atendementu. Iha tempu kalan ruma, kazu moras ruma, ami tenke telefone tuir mak mai. Ne’ebé, ha’u sente sai difikuldade ida ba ami. Ba oin, parte Governu fó atensaun hodi konstrui postu saúde atu nune’e ita-nia pesoál saúde sira bele hela iha ne’e,” nia dehan.
Suku Uabubu ho totál populasaun hamutuk 2.717 ho total uma kain hamutuk 578, ne’ebé kompostu husi aldeia Buanurak, Osogori, Lekibuti, Uailia no Letame.
Hatán ba preokupasaun ne’e, Diretór servisu saúde munisipál Vikeke, Aljacsono S. Maia, hateten tinan ida-ne’e planu konstrusaun postu saúde Uabubu seidauk, iha postu saúde rua mak sei konstrui iha fulan-Maiu no Juñu tanba orsamentu prevee ona.
“Tinan ida-ne’e, ita konstrui uluk postu saúde Maluru no postu Saúde Ossorua nian, Minsitériu Saúde prevee ona orsamentu. no kada postu saúde ida purvolta rihun $300, hodi konstrui fasilidade saúde. Postu saúde sira-ne’ebé laiha ami nafatin tau ba planu perioridade,” nia dehan.
Jornalista : Vitorino Lopes da Costa
Editór : Cancio Ximenes
