DILI, 15 Abríl 2025 (TATOLI) – Centro Nacional Chega!, Institutu Públiku (CNC, I.P) selebra akordu ho Muzeu Memoriál Munisipál Manatutu (MMMM) hodi disponibiliza rihun $14 atu halo jestaun ba muzeu ne’e.
Diretór-Ezekutivu CNC, I.P, Hugo Maria Fernandes, hateten asinatura akordu ne’ebé parte rua halo, tanba hafoin inaugurasaun iha loron 03 Marsu, pasu tuirmai mak CNC kontinua fó apoiu atu funsiona muzeu ne’e.
Akordu serbisu ne’e ba tinan ida nian atu kobre komponente importante rua mak funsionamentu instituisaun nian, katak kobre orsamentu operasionál muzeu memoriál nian no atividade sira ne’ebé muzeu memoriál sei halo.
Atividade ne’ebé muzeu sei halo mak mobiliza públiku, estudante no joven sira bá vizita fatin ne’e no sira mós halo peskiza ba dokumentu memoriál sira husi populasaun Manatutu nian.
Muzeu Memoriál Manatutu sei la serbisu mesak, maibé serbisu ida-ne’e parseria ho Konsellu Muzeu Memoriál Munisípu nian kompostu husi Prezidente Autoridade Munisípiu Manatutu, Prezidente Konsellu Kombantente Libertasaun Munisípiu Manatutu, nomós reprezentante husi asosiasaun vítima sira.
Hugo Fernandes esplika katak orsamentu rihun $14 ne’ebé apoia ba MMMM ne’e nia montante hanesan mós CNC apoiu ba muzeu sira seluk iha munisípiu seluk.
Tuir dadus, CNC estabelese ona muzeu memoriál lima iha munisípiu Kovalima, Vikeke, Aileu, Bononaru no Manatutu.
Iha fatin hanesan Jestór ba MMMM, Adelino Soares, hateten objetivu husi selebrasaun akordu mak apoia verba husi CNC ba Muzeu Manatutu hodi halo atividade instituisuan nian hanesan peskiza no prezerva dokumentu pasadu nian.
“Akordu ida-ne’e atu reforsa Muzeu Memoriál Munisipál Manatutu nian, liuliu iha parte operasionál nian nomós atividade muzeu nian atu implementa iha tinan ne’e, hanesan mobiliza estudante, joven vizita atividade muzeu hodi hatene istória no identifika sítiu istóriku sira”, dehan.
Identifikasuan ba sítiu sira mak fatin detensaun, akontesimentu masakre no abrigu baze defeza iha tempu rezisténsia nian hodi rekorda memória.
“Ita mós sei identifika vítima konflitu pasadu sira oinsá mak ita rekorda no bele prezerva memória sira ne’e iha muzeu hodi hatutan istória ba jerasaun foun sira”, salienta.
Nia informa katak hafoin inaugura muzeu ne’e, daudaun vítima na’in-10 mak prezerva ona sira-nia memória no ba oin kontinua serbisu hodi rekolla dadus sira seluk.
Dokumentu ne’ebé sira prezerva hahú husi istória pasadu 1974 to’o 1999, inklui vítima ba violasaun seksuál.
Jornalista: Arminda Fonseca
Editora: Maria Auxiliadora
