VIKEKE, 10 Jullu 2026 (TATOLI)–Autoridade Postu Administrativu Uatulari hamutuk ho Polísia Nasionál Timor-Leste (PNTL) Eskuadra Uatulari, Sesta ne’e, klarifika kona-ba rumór ema na’uk labarik na’in-ualu (8) iha Aldeia Ossokaiua, Suku Afalokai, Postu Uatulari, Munisípiu Vikeke.
Sarjentu Xefe Polísia Eskuadra Uatulari, Cipriano António Fernandes, haktuir iha ohin dadeer tuku 10h00 Otl, funsionáriu husi Ministériu Obra Públika (MOP) mai hala’o servisu iha Postu Uatulari no iha sira-nia viajen mós ajuda transporta labarik sira ne’ebé la’o ain maibé persepsaun ema-nian katak sira na’uk labarik hirak-ne’e.
“Ekipa sira-ne’e mai atu halo levantamentu dadus iha mota Bebui mak labarik hirak-ne’e sa’e tuir tiha hodi bá buka Señor ida naran Lourenço. Hafoin la’o tuir dalan komunidade espeta dehan ema na’uk labarik. Nune’e, ekipa MOP hamutuk na’in-tolu tula labarik sira mai liu edifísiu PNTL Uatulari,” Cipriano ba jornalista sira iha Eskuadra PNTL Uatulari.
Tan ne’e, nia klarifika ba públika katak informasaun ne’ebé espalla iha mídia sosiál dehan ema na’uk labarik ne’e laloos.
“Ekipa MOP mai ne’e hala’o servisu iha Uatulari. Ami identifika iha orden servisu husi MOP,” nia hato’o.
Reprezentante inan-aman labarik sira-nian, Manuel Henrique, hateten ekipa MOP iha dadeer bá Sr. Aleixo nia uma iha Aldeia Ossokaiua, maibé Aleixo bá tiha toos, ne’e mak labarik sa’e tuir bá mota Bebui, ida-ne’e mak komunidade impede tiha kareta MOP.
“Akontesimentu ne’e ami rezolve ona. Funsionáriu sira mós aprezenta orden servisu. Akontesimentu ohin ne’e ami suspeita de’it tan ami rona rumoris barak dehan ema na’ukk labarik. Tan ne’e mak ohin hapara ekipa MOP, maibé ami la estraga karreta no ema mós ami la baku,” nia hato’o.
Iha fatin hanesan, Reprezentante Ekipa MOP, Sérgio Agostinho Pinto, haktuir ekipa MOP mai Uatulari hala’o servisu hodi rekolla dadus ba mota Bebui, la’ós mai na’uk labarik sira, komunidade mak entende sala.
Entretantu, kazu suspeita na’uk labarik ne’e rezolve iha Eskuadru PNTL Uatulari no hetan asiste direta husi Administradór Postu Uatulari, Xefe Suku Matahoi, Xefe Suku Afaloikai no família husi labarik na’in-ualu.
Jornalista: Vitorino Lopes da Costa
Editór: Xisto Freitas da Piedade
