KOVALIMA, 15 Abríl 2025 (TATOLI) – Konsellu Munisipál Kombatente Libertasaun Nasionál (CMCLN-sigla portugés), Kovalima, simu ona dokumentu hamutuk 400 husi kombatente Kovalima ne’ebé foin lalais sira-nia naran pasa ona.
Sekretáriu CMCLN, Kovalima, Joaquim Barros “Sikatlet”, informa katak, kombatente sira ne’ebé mak submete dokumentu ba sira ne’ebé mak segundu rejistu iha 2009 no publika ona lista editál iha loron 15 Janeiru tinan ne’e.
“Ita-nia kombatente ne’ebé rejista iha 2009 submete ona sira-nia dokumentu atu hetan pensaun veteranu ba konsellu veteranu ne’ebé públika ona no pasa ona iha 3 a 7 , 8 a 14 , 15 a 19, 20 a 24 sobrevivénsia sira no inkapasidade”, Joaquim Barros “Sikatlet”, relata dadus ne’e ba TATOLI, iha Tabakolot, ohin.
Nia esplika katak dadus daudaun ne’e, provizóriu, kombatente 400 mak submete ona dokumentu. Ba sira ne’ebé mak iha konta bankaria sira submete kedas no sira seidauk iha konta bankaria sei hein Governu atu loke konta bankaria.
Dokumentu mak kombatente sira husi postu administrativu hitu submete ba konsellu veteranu ne’e mak hanesan fotokopia Kartaun Eleitorál (KE), Billete Identidade (BI), Sertidaun Batizmu no Sertidaun RDTL.
Pagamentu faze dahuluk iha loron 15 Dezembru
Sekretáriu CMCLN Kovalima ne’e dehan, intensaun kombatente submete dokumentu atu konfirma kombatente ne’e nia identidade bazeia ba lista ne’ebé fó sai no hanesan ho fixa ka la’e, tanba bele akontese iha dokumentu inan-aman la hanesan.
Ho nune’e nia dehan, atu hetan pensaun husi Governu ba kombatente ne’ebé submete sira-nia dokumentu ne’e ministériu sei verifika atu aprova ka la aprova nune’e Ministériu sei publika lista naran .
Tuir kalendáriu ne’ebé Ministériu Kombatente Libertasaun Nasionál (MCLN) fó sai katak pagamentu pensaun faze ba dahuluk ba kombatente ne’ebé segundu rejistu 2009 nia naran aprova sei hahú iha loron 15 fulan-Dezembru 2025 ne’e.
Kombatente ne’ebé fó sai husi munisípiu Kovalima hamutuk 9,938 kompostu husi pasa ba 20 a 24 hamutuk na’in ida, 15 a 19 na’in haat, 8 a 14 na’in 348, defisiente 28, pensaun martir 1,766,3 a 7 na’in-1,600 menus a 3 na’in-3,971, la’os kombatente na’in-210, la’ós martir 245, pendente 398, repetidu na’in-53 no la válidu na’in -1,219.
Jornalista: Celestina Teles
Editór: Rafael Ximenes de A. Belo
