VIKEKE, 15 Abríl 2025 (TATOLI)—Progresu konstrusaun kapela iha suku Uabubu, postu administrativu Ossú, munisípiu Vikeke, daudaun ne’e atinje ona 50%.
Xefe suku Uabubu, Jacinto M. A da Cruz, haktuir konstrusaun kapela iha suku Uabubu daudaun ne’e komunidade no badaen lokál sira kontinua servisu ne’ebé sira komesa taka ona zinku no hafoik taka zinku konklui ne’e sei kontinu ho atividade reboka no nahe uma laran sira-ne’e.
“Progresu fíziku dadaun ne’e atinje 50% tanba taka ona zinku. Agora, ita-nia komunidade sira konstinua esforsu servisu, atu finaliza obra referida. Projetu konstrusaun kepela ne’e orsamentu husi Programa Nasionál Dezenvolvimentu Suku (PNDS) ba tinan 2024,” Jacinto M. A da Cruz hateten ba Agência Tatoli iha postu Ossú, ohin.
Autoridade ne’e relata, projetu konstrusaun ba kepela Uabubu ne’e implementa iha tinan 2024, agora foin atinje 50% tanba dezafiu ne’ebé enfrenta mak klíma tempu udan distribui materiál konstrusaun sira-ne’e susar tebes.
“Tanba klíma mak difikulta ba servisu bainhira udan, ita halo distribuisaun materiál labele. Ho ida-ne’e progresu servisu ne’e tarde, maibé ami sei nafatin esforsu servisu. Ami fiar katak ba tinan ida-ne’e, ami sei finalize obra kapela, atu ita-nia komunidade bele utiliza hodi sai Maromak nia uma atu yhalo orasaun,” nia dehan.
Enkuantu, projetu adisionál konstrusaun kapela suku Uabubu, postu Ossú, orsamentu PNDS ho montante orsamentu totál hamutuk $62, 306.00. Konstrui iha fulan-Novembru 2024, progresu fíziku kapela atinje ona 50%, tanba obra referidade konstrui husi komunidade no badaen lokál sira.
Entretantu, kapela ne’e sei benifisia ba suku Uabubu ho totál populasaun hamutuk 2.717 ho totál uma kain 578, ne’ebé kompostu husi aldeia Buanurak, Osogori, Lekibuti, Uailia no Letame.
Jornalista : Vitorino Lopes da Costa
Editór : Cancio Ximenes
