DILI, 15 Abríl 2025 (TATOLI)—Ofisiál Negósiu Interinu Embaixada Timor-Leste iha Repúblika Uniaun Myanmar, Ynagon, liuhosi Cruz Vermelha Myanmar, Olandino Rui de Andrade, entrega apoia umanitária diretamente ba vítima sira-ne’ebé afetadu ba rai-nakdoko iha lokalizasaun ne’ebá, iha sesta (11 Abríl 2025) liubá ne’e.
Olandino Rui de Andrade haktuir, embaixada oferese apoiu umanitáriu liuhusi Cruz Vermella Myanmar no mós nesesidade báziku sira hanesan foos, mina-tein, mie instant, sardina, bee, terpal, manta, tapete, sabaun, eskova-nehan, pasta nehan, ai-moruk atu halakon susuk, ai-moruk Oitment (Oitment) no Oitment 100/05p.
Nesesidade bázika hamutuk ho montante $4.967 no montante ba transporte hamutuk $725 ne’ebé fó husi diplomata no funsionáriu sira.
“Apoiu ne’e fó tuir pedidu husi Ministériu Negósiu Estranjeiru Myanmar nian ba diplomata no organizasaun internasionál sira hotu iha terrenu, inklui Timor-Leste, hodi oferese asisténsia umanitária, atu nune’e bele tulun vítima sira-ne’ebé afetadu diretamente. Apoiu umanitáriu ne’e mak asaun empatia no simpatia hodi hatudu solidariedade ba povu Myanmar ne’ebé afetadu husi rai-nakdoko ne’e,” responsável timoroan ne’e hateten liuhusi karta eletrónika (e-mail) ba Agência TATOLI, ohin.
Iha biban ne’e, TATOLI konfirma timoroan hira mak hela iha Myqnmar, diplomata ne’e hatán katak laiha timoroan mak hela iha Myanmar, mesak diplomata timoroan ne’e de’it.
Diplomata ne’e haktuir katak, públiku akompaña besik relatóriu sira kona-ba rai-nakdoko ne’ebé akontese iha Myanmar iha loron-sesta (28 marsu), ho magnitude 7,7 iha eskala Rikusoin, ne’ebé hamosu estragu ba edifísiu públiku sira hanesan ospitál, aeroportu, eskola, estrada, ponte no igreja lokál sira no hamate ema na’in 3.670,500 kanek no lakon kanek 141 ema tuir media lokál sira fó sai.
Tuir responsável, zona sira-ne’ebé afetadu pertense ba rejiaun sira Sagaing, Mandalay, kapitál Nay Pyi Taw, Bago, Magway no Estadu Súl Shan nian iha Myanmar, ne’ebé afeta kalkula ema na’in 15,2 tuir dadus hosi Federasaun Internasionál Cruz Vermelha (IFRC) Myanmar nian.
Jornalista : Hortencio Sanchez
Editór : Cancio Ximenes
