KOVALIMA, 16 Abríl 2025 (TATOLI) – Anin boot ne’ebé akontese iha fulan-Fevereiru hamosu mós danu ba Eskola bázika Filiál (EBF) Makous ne’ebé lokaliza iha Suku Taroman , postu administrativu Fatululik, Munisípiu Kovalima.
Diretór EBC Fatululik, Eugebio da Cruz, esplika , anin sobu eskola ne’e iha loron 13 Fevereiru bainhira akontese dezastre anin boot iha Fatululik, munisípiu Kovalima nune’e to’o ohin loron seidauk hadi’a estabelesimentu ensinu referidu.
“Anin boot ne’ebé akontese iha Fevereiru ne’e hodi fó impaktu, tanba anin sobu ha’u-nia eskola EBF Makous ne’ebé lokaliza iha Suku Taroman, Postu Administrativu Fatululik munisípiu Kovalima”, Eugebio da Costa informa ba TATOLI, iha Kovalima, ohin.
Ho nune’e dirijente eskola mós submete ona proposta ba Servisu Munisipál Edukasaun Kovalima atu hadi’a eskola referida ho urjente nune’e alunu sira uza hodi hala’o prosesu aprendijazen.
Tuir dadus alunu iha EBF Makous hamutuk 56 ho nia totál manorin-na’in sira hamutuk na’in-neen (6).
Relasiona ho problema ne’e, Diretora Servisu Munisipál Edukasaun Kovalima, Elda de Fatima rekoñese no nia simu ona relatóriu husi diretór EBC Fatululik nune’e nia parte submete ona relatóriu ba edukasaun nasionál.
“Ha’u simu proposta anin sobu eskola husi Eskola Bázika Filial Makous ne’ebé ita submete ona pedidu emerjénsia iha Marsu ne’e ba edukasaun nasionál hodi hein de’it rezultadu bainhira mak atu responde pedidu ne’e”, nia klarifika.
Jornalista:Celestina Teles
Editór: Rafael Ximenes de A. Belo
