KOVALIMA, 16 Abríl 2025 (TATOLI) – Ministériu Transporte no Komunikasaun (MTK) liuhusi Diresaun Munisipál Transporte no Komunikasaun (DMTK), munisípiu Kovalima kontribui ona reseita $ 28,549.50 ba kofre Estadu.
“Hahú Janeiru to’o Marsu ne’e ami kontribui reseita hamutuk $ 28,549.50 ba kofre Estadu ne’ebé nia fonte orsamentu mai husi inspesaun, lisensa trajetu, halo rejistu, xapa mátrikula lakon no troka xapa mátrikula”, Diretór DMTK, Joaquim Gusmão, relata dadus ne’e ba TATOLI, iha Bairru Costa, ohin.
Reseita ne’ebé DMTK kontribui mai husi inspesaun, lisensa trajetu, halo rejistu, xapa mátrikula lakon no troka xapa mátrikula ho totál fatura (invoice) hamutuk 1,947 ho nia orsamentu $ 28,549.50 hodi kontribui reseita ba kofre Estadu.
Fatura hamutuk 1,947 inspesaun karreta no motorizada nia nota hamutuk 1,455 ho nia orsamentu $ 20,720.00, lisensa trajetu nota 44 orsamentu $ 825,00, karta kondusaun ho nia fatura 73 $ 1.350,00.
Fonte orsamentu husi rejistu ho totál fatura hamutuk 356 $5.317,00 xapa mátrikula lakon ho totál fatura 12 ho orsamentu $ 162,50 no troka xapa mátrikula husi privadu ba transporte públiku ho nia fatura hamutuk hitu ho orsamentu $ 175,00.
Dirijente ne’e informa katak reseita $ 28,549.50 ne’ebé mak DMTK, Kovalima, kontribui ba kofre Estadu durante fulan tolu ne’ebé iha fulan Janeiru kontribui $10.807,00, Fevereiru $9.578,50 no Marsu kontribui $8.164,00.
Fó hanoin fali katak reseita ne’ebé DMTK kontribui iha 2023 hamutuk rihun $ 70-resin, iha 2024 kontribui $ 94.633,50 no iha 2025 durante fulan tolu kontribui ona $ 28,549.50 ba kofre Estadu, ida-ne’e depende sidadaun sira-nia konsiénsia uza transporte públiku no privadu sira.
Jornalista: Celestina Teles
Editór: Rafael Ximenes de A. Belo
