DILI, 16 Abríl 2025 (TATOLI) – Konsellu Administrasaun Autoridade Portuária Timor-Leste (APORTIL) hasai sirkulár katak hahú Maiu sei aplika tarifa ba estasionamentu iha areadór Portu Dili nian.
Diretór Operasionál no Jestaun Portuária, Marcelino dos Santos, hateten objetivu hasai sirkulár ne’e tanba bazeia ba dekretu-lei númeru 19/2003 kona-ba regulasaun tarifa portuária no iha mós sirkulár husi Konsellu Administrasaun APORTIL, I.P. ho númeru ofísiu 19/CA-APORTIL, I.P/II/2025 uza no asesu iha área juridisaun Administrasaun APORTIL, I.P nian.
“APORTIL fatin komersiál, ho ida-ne’e mak ita kria ona regra ba entidade hotu ne’ebé sei utiliza espasu iha areadór Portu Dili mak sei aplika tarifa ba utilizadór tuir lei ne’ebé iha”, Marcelino dos Santos adianta ba TATOLI, ohin.
Tarifa ne’ebé sei aplika ne’e bazeia ba tipu tolu mak hanesan selu oras ida, liu oras ida to’o oras 12 no to’o oras 24.
Tarifa ne’ebé APORTIL sei aplika ba tipu karreta sira mak hanesan tuirmai:
Marcelino dos Santos adianta katak iha sirkulár ne’ebé fó sai, para to’o oras ida no liu mak selu, maibé bainhira implementa ba oin maka ema ho transporte tama iha areadór Portu Dili nian para la to’o minutu ka oras ida mós konsidera selu nafatin, tanba tama iha tipu estasionamentu para oras ida nian.
“Maneira selu ne’e, transporte ruma atu tama, seguransa sei halo cross check bainhira atu asesu bá areadór Portu nian no ami sei prepara billete ba sira tuir tipu oras ne’ebé presiza para ne’e hodi selu tuir”, dehan.
Vantajen para iha estasionamentu iha areadór Portu Dili mak IHA área ne’ebé luan, asesivel, seguransa iha oras 24 no iha CCTV ne’ebé akompaña.
Sirkulár ida-ne’e, Konsellu Administrasaun Portuária Timor Leste aprova ona iha loron 13 Fevereiru 2025.
Jornalista: Arminda Fonseca
Editora: Maria Auxiliadora
