VIKEKE, 16 Abríl 2025 (TATOLI)—Komandante Polísia Nasionál Timor-Leste (PNTL) munisípiu Vikeke, Superintendente António Rego Fernandes, informa hahú husi fulan-Janeiru to’o fulan-Abríl, PNTL munisípiu Vikeke liuhusi unidade tránzitu konsege rekolla taxa infrasaun rodoviáriu hamutuk $6,017 hodi kontribui ba kofre Estadu.
“Reseita ne’ebé ita hahú rekolla husi trimestre dauluk halo auto stop ne’e, ita konsege hatama reseita hamutuk Janeiru to’o Abrílne’e hamutuk $6,017. Ami haree reseita ne’ebé boot iha fulan Marsu nian laran ne’e to’o $3.000-resin mak ami hatama ba iha kofre Etsadu,” Superintendente António Rego Fernandes, hateten ba Agência TATOLI, iha ninia kna’ar fatin, Base Camp, ohin.
Superintendente António afirma, unidade tránzitu rekolla reseita barak tanba ema viola estrada públiku ne’e barak, tanba abitante sira nafatin hatudu dixipliña no kumpri lei kódigu Estrada, tanba Dekretu-Lei Nú. 6/2003, ne’ebé Públikadu iha Jornál Repúblika loron 6 fulan-Agostu tinan 2003.
“Maske ita halo beieik sensiblizasaun lei ba ita-nia sosiedade no motorista sira, maibé nafatin viola kódigu estrada. Tan ne’e, mak ita hetan koima mós barak no ami nafatin husu ita-nia motorista sira kumpre kódigu Estrada,” nia dehan.
Nune’e mós, nia dehan, servisu tránzitu munisípiu Vikeke kada loron kontinua halo sensiblizasaun hodi fó hanoin ba motorista sira-ne’ebé utiliza estrada públiku hosi hatudu dizipliña, kumpre sinál tránzitu sira no halo auto stop ba estrada públiku sira iha munisípiu Vikeke.
“Durante iha trimestre dahuluk, ami rejista mós kazu asidente tráfiku ne’e iha ualu. Husi númeru kazu asidente ne’e kanek kaman haat (4), kanek todan haat (4). Depois asidente tráfiku ne’ebé rezolve família hamutuk ualu (8),” nia dehan.
Daudaun ne’e, nia dehan, movimentu transporte públiku sira iha kapitál no postu sira la’o normál tanba PNTL kontinua monitoriza no alerta ba motorizada sira utiliza estrda uza kapasete.
“Tanba agora ita haree estrada públiku sira-ne’ebé iha kapitál no postu barak kondisaun aat ba beibeik. Tan ne’e, ami sempre avizu ba abitante sira uza motorizada iha estrada públiku tenke uza kapasete ne’e obrigatóriu. Kapasete ninia funsaun hodi proteje ba ita-nia ulun bainhira akontese dezastre ruma, ne’ebé mak ita la espera,” nia hateten.
Tuir dadus, reseita kada fulan hahú husi fulan Janeiru hamutuk $1,404, Fevereiru hamutuk $1,082, Marsu hamutuk $3,365 no fulan-Abríl ne’e hamutuk $,166, ho totál reseita hamutuk $6,017.
Jornalista : Vitorino Lopes da Costa
Editór : Cancio Ximenes
