VIKEKE, 16 Abríl 2025 (TATOLI)—Provedór Direitu Umanu noJustisa (PDHJ), Virgílio da Silva Guterres ‘Lamukan’, husu autoridade munisípiu Vikeke respeitu diretu umanu ba implementasaun planu ordenamentu territoriál iha munisípiu Vikeke.
“Ami sujere ba autoridade munisípiu Vikeke liuliu ba planu futuru atu halo ordenamentu territoriál ba sidade kapitál Viekeke nian, respeita diretu umanu komunidade nian. Kualker prosesu dezenvolvimentu implika ba diretu umanu tenke fasilita partisipasaun komunidade. Bainhira foti desizaun ruma komunidade tenke partisipa iha prosesu hola desizaun nian, halo diálogu ho kumunidade sira, molok implementa planu ruma,” Virgílio da Silva Guterres ‘Lamukan’, hateten ba jornalista sira hafoin ramata enkontru ho autoridade munisípiu Vikeke, ohin.
Virgílio profunda, implementa ordenmentu territoriál implika ba espropriedade privada tenke iha indeminizasaun ne’ebé justu ba konunidade.
“Atu nune’e prosesu ne’ebé la’o iha Vikeke, labele akontese hanesan iha Dili ne’ebá ita haree komunidade lamenta no preokupa. Tan ne’e, mak ami fó hanoin ba autoridade sira, ami haksolok tanba autoridade sira fó garantia ba ami katak sira halo diálogu no koordena ho komundiade sira muda negosiante sira ba merkadu Olobai,” nia dehan.
Nia prefere, implementa dezenvolvimentu tenke partisipativu husi komunidade hanesan mós iha tinan 1999 lori ferik-katuas, ema ho difisiénsia sira ba partisipa votu hodi manán independénsia ida-ne’e.
“Nune’e, iha prosesu dezenvolvimentu ida-ne’e mós ita tenke envolve sira hanesan uluk. Tan ne’e, ita presiza rona komunidaade nian lian, atu sidade sai di’ak no furak ema hotu sente orgullu. Ba autoridade sira labele baruk halo klarifikasaun servisu liuliu akuzasaun sira-ne’ebé iha rede sosiál kona-ba atendementu hanesan servisu Notriadu, servisu agrikultura no edukasuan tenke halo esplikasaun,” nia dehan.
Aleinde ne’e, nia husu, servisu edukasaun munisípiu Vikeke tau matan eskola sira, atu profesór sira labele uza violénsia hsoru estudante sira iha eskola.
Iha fatin habnesan, Prezidente Autoridade munisípiu (PAM) Vikeke, Francisco Cruz Simões de Gonzaga Soares haktuir prezensa PDHJ mai Vikeke importante tebes tanba fó hanoin ba autoridade sira, atu implementa boa-governasaun tuir dalan ne’ebé loos.
“Atu muda negosiante sira iha merkadu antiga ba merkadu Olobai, ami realiza ona prosesu diálogu kuaze dala rua ho negosiante sira no negosiente sira mós prontu, atu kolabora no koopera. Ami mós sei kria kondisaun ne’ebé atu reabilita fila-fali merkadu Olobai, hafoin muda negosiante sira ba ne’ebé ho fatin dignu,” nia hateten.
Jornalista : Vitorino Lopes da Costa
Editór : Cancio Ximenes
