BAUKAU, 16 Abríl 2025 (TATOLI)-Komandante Polísia Nasionál Timor-Leste munisípiu Baukau, Superintendente João Sancho Pires, hatete orienta ona eskuadra buka tuir suspeitu na’in rua ba kazu sekuestru hasoru labarik ho tinan-neen iha Triloka, foin lalais ne’e.
“Serbisu sekretu no tránzitu chekpoint (pasa revista) nafatin, buka ema sira-ne’e. Ema ne’e uza motor laiha matrikula, maibé tenta buka nafatin”, dehan nia iha Vila Nova, kuarta ne’e.
Superintendente João Sancho Pires haktuir ninia kronolojia ne’ebé akontese iha loron tersa, 15 Abril, iha suku Triloka, bainhira labarik mane-ida ho tinan-neen ne’ebé la’o-ain, mosu motorista no ema-ida husi kotuk kous labarik hodi-tula maibé vitíma konsege salva-an ho maneira haksoit tun husi motor no halai.
PNTL Baukau, nia dehan kontinua halo esforsu atu kompleta dadus liuhosi investigasaun. Tanba ne’e nia apela ba komunidade atu hato’o informasaun ba parte seguransa kuandu mosu indísiu husi pesoál ne’ebé halo movimentu ho motorizasa la-ho xapa matrikula.
Notísia relevante: PNTL asegura sidadaun ida ne’ebé deskonfia naok labarik iha Manleuna
Jornalista : Natalino Belo
Editora : Rita Almeida
