VIKEKE, 16 Abríl 2025 (TATOLI)—Provedór Direitu Umanu no Justisa (PDHJ), Virgílio da Silva Guterres ‘Lamukan’, hateten PDHJ halo ona koordenasaun ho Prezidente Autoridade munisípiu Vikeke Francisco Cruz Simões de Gonzaga Soares hodi oferese espasu koloka pontu fokál na’in-rua iha Vikeke.
“Ohin, ami halo pakote vizita ida mai Vikeke hodi hasoru malu ho PAM Vikeke no ninia estrutura, esklarese papél PDHJ nia servisu durante ne’e. Nune’e, ami informa kona-ba ami-nia planu ba tinan ida-ne’e atu destaka pontu fokál PDHJ nian rua iha munisípiu Vikeke,” Virgílio da Silva Guterres ‘Lamukan’ ba jornalista sira, iha resintu administrasaun Vikeke, ohin.
Nia husu, PAM Vikeke hodi oferese espasu ruma ba destakamentu pontu fokál PDHJ nian iha Vikeke atu fasilita sira hodi bele utiliza ba servisu.
“Agradese ba PAM Vikeke ne’ebé ho disponiblidade prontu atu fasilita fatin ba PDHJ. Fulan Juñu, ami hahú halo rekrutamentu pontu fokál sira, depois rekrutamentu ramata ami sei destaka mai Vikeke,” nia hateten.
Iha biban ne’e, Prezidente Autoridade munisípiu Vikeke Francisco Cruz Simões de Gonzaga Soares hateten, autoridade Vikeke prontu simu destakamentu PDHJ mai munisípiu Vikeke hodi ajuda autoridade sira haree servisu sira iha munisípiu Vikeke.
“Ami agradese ba PDHJ hakarak destaka sira-nia pontu fokál mai Vikeke, tanba bele halo kontrulu ba ami-nia ukun. Se foer ruma iha ha’u-nia oin, ha’u labele haree, so ema seluk mak bele haree foer ne’ebé iha ha’u-nia oin. Tan ne’e, ha’u sente prezensa pontu fokál atu mai Vikeke ne’e importente, hodi fó hanoin fila-fali ba autoridade sira hodi ukun tuir dalan ne’ebé loloos,” PAM Vikeke esklarese.
Kona-ba espasu, nia dehan, maske iha Vikeke espasu klot maibé autoridade sira buka detallamaneira buka fatin ba pontu fokál sira hodi uza ba servisu.
Jornalista : Vitorino Lopes da Costa
Editór : Cancio Ximenes
