DILI, 17 Abríl 2025 (TATOLI)—Deputadu Bankada Governu husi Kongresu Nasionál Rekonstrusaun Timorense (CNRT), Natalino dos Santos, observa serbisu husi Prezidente Autoridade Rejiaun Administrativa Espesiál Oekusi Ambeno (RAEOA), Rogeiro Lobato ho nia estrutura hatudu progresu di’ak.
“Hakarak apresia Autoridade RAEOA ne’ebé hala’o nia serbisu ne’ebé hetan konfiansa husi IX Governu Konstituisionál hodi asume responsabilidade ida agora, nia knaar foin tinan-ida, iha buat barak presiza halo. Ita haree povu Oekusi oan sira apresia tanba sira bele sa’e aviaun, munisípiu 13 só ita-nia povu ain tanan sira ne’ebé iha foho sira mak bele sa’e aviaun tanba enklave atu mai Dili sa’e aviaun. Ida-ne’e pontu di’ak no apresia tebes ba inisiativa ida-ne’e,” Deputadu hato’o iha resintu Parlamentu Nasionál (PN), kinta ne’e.
Notisia relevante : Rogério Tiago Lobato nomeadu nu’udar Prezidente Autoridade RAEOA ba tinan-lima
Nia nota, kondisaun seluk, ema hotu louva dezenvolvimentu iha Oekusi ne’ebé la’o ona durante tinan-10, maski iha Pante Makasar de’it. Maibé daudaun estrada hahú loke ona husi postu haat, daudaun loke ona estrada ba Pasabe, Nitibe, Oesilu.
Reprezentante povu ne’e observa, iha mós estrada liga husi suku ida bá suku seluk.
“Objetivu atu estabelese zona ekonomia sosiál no merkadu nomós autoridade administrativa espesiál ne’e atu fó atendimentu ba povu, liuliu atu hasai povu husi izolamentu,” nia akresenta.
Deputadu ne’e foti konkluzaun, Autoridade atuál foin asume knaar durante tinan-ida ho balun, maibé iha mudansa, tanba infraestrutura bázika balun la’o daudaun.
“Uluk tinan hira ninia laran, suku tolu iha Pante Makasar de’it maibé daudaun estrada komesa to’o ona fatin-fatin, ne’e di’ak no ita apresia,” nia tenik.
Deputadu ne’e haree katak, ho esforsu tomak husi Autoridade, postu Oesilu no Oesilu Napan hahú loke ona, husi kondisaun uluk sai ida de’it husi Sakato.
“Apresia ba avansu, maibé enkoraja nafatin Prezidente Autoridade atu haree kondisaun bázika hanesan falta bee-moos, karik iha tinan oin mai haree tau ona prioridade hanesan bee-moos ba suku sira, ida-ne’e mak importante, ita haree eletrisidade kuaze konklui ona. Tenke haree husi avansu sira ne’e tanba tinan-ida resin ita haree buat barak la’o ho di’ak,” nia dehan.
Jornalista : Nelson de Sousa
Editora : Julia Chatarina
