Pe. Cimpiliu husu sarani sira banati tuir Jesus fase eskolante nia ain
VIKEKE, 17 Abríl 2025 (TATOLI)—Vigáriu párokia Nosa Senora de Fatima Uatulari, munisípiu Vikeke, Pe. Cimpiliu Bau Mali, SVD, husu sarani sira presiza banati tuir Jesus hodi fase eskolante nia ain ne’e, sinál moris haksolok no dame nian.
“Iha kalan ne’e Jesus fase ninia eskolante sira-nia ain, hodi fó hanoin ba ita atu hakbesik an ba Jesus hodi fase ita-nia isin no raan lalehan nian. Nune’e husu ba ita atu hamutuk ho Jesus la’ós relasaun privadu, la’ós fiar nain, maibé ita atu pasparte ba na’in nian laran luak. Na’in husu ita atu banati tuir Jesus, husi Nia presenza fase ita-nia ain, atu ita-nia moris sinál haksolok no dame,” Pe. Cimpiliu Bau Mali, hateten ba sarani sira iha ninia omília bainhira preside kinta-feira santa, iha Igreja Uatulari, ohin.
Pe. Cimpiliu hatutan, ohin kalan Jesus nafatin haraik aan serní hamoos ain ne’ebé fo’er, ain ne’ebé sama buat hotu la’ós buat di’ak, maibé sempre sama buat ne’ebé aat sira.
“Tan ne’e, Jesus hateten ba eskolante sira no ba ita hotu katak ema ne’ebé haris ona, fase de’it ain, basa ninia isin moos ona. Ida-ne’e ita atu tuir ninia ezemplu fase ain ho intensaun fó perdua ba malu, tanba ita ema-nia dignidade hodi simu ita-nia fallansu no ita depende ba ita arogansia. Maibé, Nai husu ita atu nakloke aan,” nia dehan.
Tanba ne’e, Pe. Cimpiliu Bau Mali, SVD, haklaken iha kinta-feira santa ne’e Jesus husu atu konsentra hodi hamoris valór mandamentu hadomi malu, hakaaas an hodi hetan loron moris eukaristia.
“Buat ne’ebé ita atu fase mak ita-nia hanoin, fase ita-nia hanoin no neon nakloke no fase ita-nia fuan, atu ita-nia fuan ne’e nakloke, hodi re-estabilidade, iha konsisténsia, kompromisu ida de’it, atu haburas igreja no nasaun ida-ne’e. Tanba ne’e, ita labele ho esperansa falsu ba ita-nia maluk seluk,” nia hateten.
Nune’e mós, nia dehan, ba sarani hmutuk hodi hatudu faternidade, unidade tanba hamutuk mak bele konvense ba malu.
“Loron ohin ita halo rekonsilasaun, revitalizasaun no loron ohin ita hametin relasaun ho aman Maromak, atu la’o tuir fali nia dalan. Tan ne’e, Nai konvida ita atu fila-fali ba nia, hodi moris hamutuk ho nia no iha mizerrikordia,” nia afirma.
Entretantu, selebrasaun misa kinta-feira santa ne’e partisipa husi autoridade lokál no hetan partisipa másimu husi sarani sira iha postu administrativu Uatulari, no hetan seguransa husi Polísia Nasionál Timor Leste (PNTL) eskuadra Uatulari.
Kinta-Feira Santa
Kinta-feira santa nu’udar kalan domin, haraik-aan no kalan sakrifísiu. Kinta-feira santa hanesan tempu Han-Kalan Ikus, ida-ne’e la’ós hahan baibain tanba iha kalan ne’e mak Jesus harii Santa Eukaristia, hodi oferese Ninia Isin no Ran iha forma paun no tua nian: “Halo ida-ne’e hodi hanoin ha’u.” (Lucas 22:19)
Jestu ida seluk ne’ebé hamosu iha Kinta-Feira Santa mak fase apostolu sira-nia ain, tanba iha sosiedade ida-ne’ebé fase ain mak kna’ar ida ba atan ne’ebé ki’ik liu, Jesus hola kna’ar atan nian no fase ain sira ne’ebé Nia hadomi. “Se Ha’u, imi nia Na’i no Mestre, fase ona imi nia ain, imi mós tenke fase malu nia ain.” (João 13:14).
Jornalista : Vitorino Lopes da Costa
Editór : Cancio Ximenes
