VIKEKE, 17 Abríl 2025 (TATOLI)—Komandante Polísia Nasionál Timor Leste (PNTL) munisípiu Vikeke, Superintendente António Rego Fernandes, husu abintante sira iha munisípiu Vikeke kria pás no establidade iha semana santa ne’em tanba kreda husu sarani sira hodi halo meditasaun no kontempla Jesus nia paixauu no Jesu Nia moris hias.
“Ohin, ami hahú implementa alerta ida to’o loron 21 fulan-Abríl, iha tempu paskua. Bázeia ba dexpaisu husi komandu jerál PNTL mai munisípiu Vikeke nune’e ami prodús fali planu tátiku ba eskuadra sira hodi asegura máximu ba selebrasaun semana santa páskoa ho di’ak no seguru. Tan ne’e, ami husu ba ita-nia abitante sira kria pás no establidade iha semana santa nian laran,” Komandante PNTL munisípiu Vikeke ne’e hateten ba Tatoli, iha ninia kna’ar fatin, ohin.
Komandante PNTL ne’e profunda, abitante iha munisípiu Vikeke maiória sarani katólika ne’ebé iha tempu kuarezma sarani ida-idak tenke hakmatek hodi semana santa ho di’ak.
“Ita hatu-hotu hatene katak iha semana santa ne’e sai hanesan loron ne’ebé mak ita-nia Jesus Kristu terus no to’o mate iha kruz, ida-ne’e sai hanesan sinál salvasaun ba ita sira-ne’ebé sei moris. Tan ne’e, ita nu’udar ema kristaun nafatin hatudu ita-nia dixipliña hodi selebra semana santa ho domin no dame,” nia dehan.
Nune’e, nia dehan, membru PNTL hahú kinta-feira santa ne’e koloka ona ba igreja sira iha munisípiu Vikeke hodi fó seguransa, misa loron kinta-feira santa kalan Jesus fase apostolu nia ain, atu sarani sira partisipa misa ho hakmatek.
“Komesa husi ohin ami destaka ona ita-nia membru PNTL sira ba iha fatin igreja sira hodi asegura misa, nune’e mós aban sestafeiras anta sei halo viasakra, PNTL sira sei akompaña hodi fó seguransa, atu komunidade sira bele selera ho hakmatek. Maske ita menus rekursu maibé ami jere tuir rekursu ne’ebé iha munisípiu Vikeke,” nia hateten.
Tuir dadus membru PNTL iha munisípiu Vikeke daudaun ne’e membru PNTL efetivu ho totál hamutuk na’in 139 ne’ebé koloka iha eskuadra lima no komandu PNTL munisípiu Vikeke.
Kinta-Feira Santa
Kinta-feira santa nu’udar kalan domin, haraik-aan no kalan sakrifísiu. Kinta-feira santa hanesan tempu Han-Kalan Ikus, ida-ne’e la’ós hahan baibain tanba iha kalan ne’e mak Jesus harii Santa Eukaristia, hodi oferese Ninia Isin no Ran iha forma paun no tua nian: “Halo ida-ne’e hodi hanoin ha’u.” (Lucas 22:19)
Jestu ida seluk ne’ebé hamosu iha Kinta-Feira Santa mak fase apostolu sira-nia ain, tanba iha sosiedade ida-ne’ebé fase ain mak kna’ar ida ba atan ne’ebé ki’ik liu, Jesus hola kna’ar atan nian no fase ain sira ne’ebé Nia hadomi. “Se Ha’u, imi nia Na’i no Mestre, fase ona imi nia ain, imi mós tenke fase malu nia ain.” (Joao 13:14).
Jornalista : Vitorino Lopes da Costa
Editór : Cancio Ximenes
