DILI, 19 Abríl 2025 (TATOLI)- Futebolista João Pedro sei reprezenta Timor-Leste hodi partisipa jogu All-Stars ASEAN ka jogu karidade internasionál hodi hasoru Manchester United iha loron 28 Maiu 2025, iha Estádiu Nasionál Bukit Jalil, Kuala Lumpur- Malázia.
João Pedro hetan oportunidade ne’e tanba bazea ba selesaun ho dezempeñu ezemplár no profisionalizmu ne’ebé reflete valór sira futeból ASEAN nian.
Nune’e, Prezidente Federasaun Futeból ASEAN (AFF), Majór Jenerál Khiev Sameth hato’o mós konvite VIP ba Prezidente Federasaun Futeból Timor-Leste (FFTL), Nilton Gusmão dos Santos hodi akompaña jogu karidade internasional referidu.
“Ho ksolok boot ha’u informa ba ita-boot katak jogadór tuirmai ne’ebé reprezenta ita-boot nia Asosiasaun membru sira atu hamutuk ho Ekipa All-Stars ASEAN nian iha jogu karidade internasionál mak João Pedro Da Silva Freitas. Hanesan espresaun ida ne’ebé maka’as ba ami nia apresiasaun kle’an ba ita-boot nia lideransa ne’ebé respeitadu no apoiu maka’as ba kreximentu futeból nian iha rejiaun ASEAN, sei sai ami nia onra atu simu ita-boot nu’udar bainaka VIP AFF nian iha okaziaun signifikativu ida-ne’e”, refere nota ne’ebé TATOLI, I.P asesu, ohin.
Iha nota refere katak eventu ne’e hanesan parte ida husi Maybank Challenge Cup ka eventu prestijiadu ida-ne’e sei selebra ASEAN nia exelénsia futeból nian enkuantu halibur ita-nia rejiaun hodi apoia kauza signifikativu ida hodi halibur fundu sira ba Fundasaun Al-Sultan Abdullah (YASA), ne’ebé reflete ita-nia fiar iha futeból nu’udar forsa ida ba inspirasaun no impaktu sosiál.
Nune’e mós, ASEAN Futball Federantion (AFF) nomeia ona Kim Sang-Sik, Treinadór Xefe husi Ekipa Nasionál Vietname nian no manan-na’in husi ASEAN Mitsubishi Electric Cup 2024, hodi lidera Ekipa All-Stars ASEAN nian. Ninia lideransa, vizaun, no forsa tátika halo nia sai figura ideál atu halibur talentu di’ak liu iha rejiaun ba eventu prestijiadu ida-ne’e.
Jornalista: Natalino Costa
Editór: Florencio Miranda Ximenes
