DILI, 22 Abríl 2025 (TATOLI) – Reuniaun Konsellu Ministru Estraordináriu ohin dekreta Lutu Nasionál durante loron hitu ba falesimentu Papa Francisco.
Períodu Lutu Nasionál hahú iha tuku 10 dadeer iha loron 22 no remata iha meianoite iha loron 28 Abríl.
“Ita hotu hatene Amu Papa falesidu, nune’e husi duni Primeiru-Ministru Xanana Gusmão no Prezidente Repúblika José Ramos Horta no ko’alia mós ho Prezidente Parlamentu Nasionál, Maria Fernanda Lay, iha koordenasaun tomak mak Governu ohin tuir lei aprova loron lutu nasionál iha ita-nia nasaun durante loron hitu, nomós bandeira meia aste, katak bandeira to’o riin klaran de’it”, Ministru Prezidénsia Konsellu Ministru, Agio Pereira, informa iha Palásiu Governu, ohin.
Nia hateten ida-ne’e hanesan hasa’e espresaun solidaridade hanesan rai barak mós halo iha Estadu sira, halo ida-ne’e hanesan tuir regra ne’ebé komunidade internasionál sempre adota.
Relasiona ho falesimentu Papa Francisco nian, governante dehan sei iha tan informasaun kona-ba misa ne’ebé sei konsentra iha Tasi Tolu, iha mós tau ai-funan no atividade seluk konforme igreja simu informasaun husi Vatikanu.
“Kuandu iha eventu boot sira ne’e Governu sei konsede toleránsia pontu hodi fasilita atividade sira ne’e la’o di’ak. Ita-nia Governu liuhusi Ministériu Administrasaun Estatál (MAE) koordena diretamente ho Amu Kardeál hodi fó asisténsia ne’ebé igreja presiza atu ita-nia povu bele kondignamente espresa sira-nia solidariedade iha momentu ne’ebé ita-nia nasaun triste”, adianta.
Antes ne’e, Governu hodi nia naran rasik no hodi povu timoroan nia naran hato’o ona “sentidas kondolénsias ba Igreja Katólika, ba Koléjiu Kardeál sira-nian, ba povu Arjentinu no ba sarani sira hotu iha mundu tomak,” ba “Sua Santidade Papa Francisco ninia mate, líder espirituál ida ne’ebé ho influénsia boot tebetebes ba umanidade, defensór ne’ebé lakole ba sira ne’ebé vulneravel liu no promotór dame, justisa no fraternidade nian entre povu sira”.
Lembra katak Papa Francisco mate ho idade 88, iha loron 21 Abríl 2025, pur volta tuku 07h35 oras Vatikanu.
Notísia relevante: Timor-Leste anúnsiu lutu nasionál ba Papa Francisco nia mate
Jornalista: Arminda Fonseca
Editora: Maria Auxiliadora
