BAUKAU, 22 Abríl 2025 (TATOLI)-Figura Papa Francisco ne’ebé mundu koñese hadomi no hakuak ema hotu hodi hametin fraternidade umana entre relijiozu, hamosu sentimentu lakon, la’ós de’it husi ema Katólika maibé relijiaun seluk iha Timor-Leste.
“Ami sente lakon tebes, tanba figura ne’ebé di’ak no úniku iha mundu, nia mak toleránsia liu iha mundu, la’ós sarani Katólika de’it mak lakon, maibé ami musulmanu mos lakon”, xefe komunidade musulmanu, munisípiu Baukau, Samsul Bahari Ribeiro, hateten iha Vila Nova, tersa ne’e.
Sentimentu hanesan hato’o husi lider Igreja Kristaun Evanjelika munisípiu Baukau, Pastor Anacleto dos Santos. “Ami-nia sentidu kondolénsia ba Papa Francisco, lider mundu ida lakon iha ita-nia klaran, la’ós ba maun-alin Katólika de’it, maibé ami mos sente lakon”.
Samsul Bahari Ribeiro konsidera Papa Francisco, pesoál pluralismu iha mundu. Enkuantu, Pastor Anacleto konsidera Papa Francisco nu’udar lider espirituál ne’ebé sempre kampaña konaba hametin pás no unidade.
Papa Francisco hakotu iis iha loron segunda, 21 Abríl 2025, tuku 07:35 oras Vatikanu nian. Oras Vatikanu ho oras Timor-nian diferente oras hitu.
Papa Francisco mate ho idade-88, tanba derrame serebrál, koma no kardiorrespiratória mak para.
Notísia relevante: Alkatiri: Papa Francisco nu’udar mensajeiru ba Fraternidade Umana
Jornalista : Natalino Belo
Editora : Rita Almeida
