KOVALIMA, 22 Abríl 2025 (TATOLI) – Ministériu Edukasaun (ME), liuhusi Diresaun nasionál infraestrutura edukativa, konstrui ona Eskola Bázika Filiál (EBF),1,2 Aitoun, iha Postu administrativu Fatululik, Munisípiu Kovalima.
Diretora Servisu Munisipál Edukasaun Kovalima, Elda de Fátima, informa, prosesu konstrusaun eskola iha Aitoun daudaun ne’e la’o hela nune’e nia progresu konstrusaun besik atu finaliza ona.
“Ita la iha projetu komunitária maibé empreza mak hahú halo ona kontrusaun EBF Aitoun iha Postu administrativu Fatululik, besik finaliza ona no EBF Halik, foin mak atu halo konstrusaun”, Dirijente edukasaun ne’e informa ba TATOLI, iha Santa Rosa, ohin.
Prosesu konstrusaun eskola EBF Aitoun besik finaliza ona tanba progresu konstrusaun tama ona faze atu taka kalen.
Aleinde konstrui Eskola EBF 1,2 Aitoun, dirijente mós informa, empreza ne’ebe nia lembra naran atu hahú konstrui ona eskola EBF Halik lokaliza iha suku Beko, Postu Suai, munisípiu Kovalima.
Bazeia ba kuadru ne’ebé taka konstrusaun eskola Bázika Filiál 1,2, Aitoun, Postu Fatululik, munisípiu Kovalima konstrui husi Empreza kontratór Surik Saki Rai Unipesoal, Lda, ho númeru referénsia Sc 054/ME-DNA/2024.
Implementasaun projetu ne’e ho durasaun tempu durante fulan neen ne’ebé hahú iha Setembru 2024 ne’ebé sei finaliza iha Marsu 2025 ho totál orsamentu $ 95.414.39.
Jornalista:Celestina Teles
Editór: Rafael Ximenes de A. Belo
