DILI, 22 Abríl 2025 (TATOLI) – Prezidénsia Konsellu Ministru, Agio Pereira, lori Governu no povu timorense hato’o sentidu kondolénsia ba sua santidade Papa Francisco, husu povu atu hasa’e orasaun no agradese ba mensajen furak ne’ebé Papa Francisco husik hela mai sarani timor iha Tasi-Tolu Dili.
Sua santidade Papa Francisco hakotu iis, dadeer tuku 07:35 iha Vatikanu, Roma, Itália ho idade 88.
“Ho sentimentu aprofunda no tristeza, Timor-Leste simu novidade sua santidade Papa Francisco hakotu iis. Papa Francisco nu’udar líder espirituál ne’ebé konsidera iha influénsia maka’as ba umanidade, defensór ne’ebé la sente kolen no sai hanesan inspirasaun ba pás, justisa no fraternidade entre povu”, Agio Pereira hateten, iha nia diskursu.
Antes ne’e iha loron 09 to’o 11 fulan Setembru, Santidade Papa Francisco halo vizita iha Timor-Leste, ida-ne’e sai hanesan momentu istóriku ida mai TL. Ho prezensa Sua Santidade ne’e konsege halibur ona povu rihun ba rihun iha manifestasaun ba fiar no advokasaun.
“Selebrasaun momentu eukarístia iha Tasi-Tolu, Dili kuazé sarani Katólika nain rihun atus-neen mak partisipa no durante vizita ida-ne’e nia mós hato’o hela mensajen esperansa kona-ba unidade komitmentu ba pás no importánsia juventude, protesaun ba valór kulturais no espirituais ba povu timorense”, governante ne’e haktuir.
Tanba ne’e tuir reprezentante Governu, lembra fali vizita ikus Sua santidade Papa Francisco iha Timor-Leste, hateten katak, ida-ne’e la’ós vizitasaun ne’ebé simples, maibé ne’e hasoru malu ne’ebé aprofunda ba povu sira-ne’ebé terus no hakarak iha liberdade ba independénsia.
“Santu padre to’o iha Timor-Leste, no konkista ona sentimentu no domin iha nasaun ida-ne’e, no konsege husik hela mensajen ne’ebé forte katak, Povu Timor transforma sira-nia kultura sai ba relijiaun, no sira berhasil iha kultura, rekonsiliasaun, tolerasaun no perdua”, Ministru ne’e esplika.
Kultura povu ida nian, ne’e kolokasaun boot husi ezisténsia ba valór pás, armónia no solidariedade, povu ida-ne’e tenke sai gratidaun husi esforsu ne’ebé iha.
“Tanba ne’e hodi Governu no povu timorense nia naran, hato’o sentidu kondolénsia ba igreja Katólika, koléjiu Kardiais ba povu Argentina no ba fiar sarani Katólika sira nian iha mundu tomak” nia hatutan tan.
Nia énfaze, aleinde ne’e Governu mós hakarak informa katak, aban sei iha reuniaun extraordináriu konsellu ministru atu dekreta kona-ba lutu nasionál liuhusi hasa’e bandeira ba omenajen memória sua santidade Papa Francisco nian durante semana ida.
Biografia Papa Francisco
Papa Francisco ho naran orijinál Jorge Mario Bergoglio, moris iha Buenos Aires, Argentina iha loron 17 fulan-Dezembru 1936. Nia inklina aan iha igreja no fó dedikasaun tomak atu servi Jesus, no iha tinan-1998 nia hetan nomeasaun nu’udar arsebispu iha Buenos Aires, enkuantu iha tinan-2001 nia kontinua sai kardeál ida iha igreja Katólika, no iha loron 13 fulan-Marsu 2013 nia simu
Eleitu ba pontifikadu igreja Katólika nu’udar Papa Francisco ne’ebé sai símbolu umildade no komprimisu ba pobreza sira.
Durante ninia pontifikadu nu’udar amu papa, nia sai hanesan eransa tanba nia iha dedikasaun tomak no firme ba justisa sosiál no diálogu entre relijiaun sira, nia mós nu’udar ema ida-ne’ebé iha komitmentu maka’as hodi promove direitus umanus ba dignidade povu nian, konsege inspira ona ema rihun ba rihun iha mundu ne’e ho ninia mensajen kona-ba domin, eransa no solidariedade.
Entretantu iha oportunidade ida-ne’e, mós husu ba povu Timor-Leste tomak atu halo reflesaun liuhusi hasa’e orasaun no fiar mundu nian, hodi agradese ba misaun santidade Papa Francisco nian durante ne’e.
Jornalista: Alexandra da Costa
Editór: Rafael Ximenes de A. Belo
