DILI, 22 Abríl 2025 (TATOLI)—Órgaun soberania daruak Parlamentu Nasionál (PN), dadeer ne’e, hasa’e bandeira Repúblika Demokrátika Timor-Leste (RDTL) meia-haste hodi fó omenajen falesimentu Amu Papa Francisco.
Tuir ajenda iha reuniaun plenaria segunda ne’e, ho ajenda períodu orden do dia halo aprovasaun votu pezár ba falesimentu Santu Padre Papa Francisco no realiza sesaun solene espesiál, maibé adia fali ba loron seluk tanba sei haree ho ajenda desizaun balun husi Governu.
“Ami tuir Governu katak sei iha dekretu Governu ba lutu nasionál ho bandeira meia-haste hahú ohin, agora ba oin halo nusa ita hein para iha orden husi parte ida de’it,” Prezidente Parlamentu Nasionál, Maria Fernanda Lay, hato’o iha resintu PN, segunda ne’e.
Notísiarelevante : Timor-Leste anúnsiu lutu nasionál ba Papa Francisco nia mate
Papa Francisco hakotu iis ho idade 88, iha Segunda dadeer tuku 07:35 (oras Vatikanu).
Líder másimu Igreja Katólika globál ne’e hakotu iis, hafoin luta ho komplikasaun pneumonia iha fulan ikus ne’e.
Jornalista : Nelson de Sousa
Editora : Julia Chatarina
