HNGV rejista bebé 84 durante selebrasaun Páskua
DILI, 23 Abríl 2025 (TATOLI) — Hospital Nasionál Guido Valadares (HNGV) liuhusi Departamentu Maternidade, rejista bebé hamutuk 84 moris durante selebrasaun Santa-Páskua. Husi númeru ne’e rejista mós bebé na’in-rua mate iha inan nia kabun-laran.
Xefe Ðepartamentu Maternidade husi HNGV, Zinia Mascarenhas, informa, durante tempu páskua bebé moris iha ospitál nasionál hamutuk 84, husi númeru ne’e inklui na’in-rua mate iha inan nian kabun-laran.
“Durante selebrasaun loron páskua, hahú husi loron 17 to’o 21 fulan-Abríl tinan 2025, bebé hamutuk 84 mak moris iha sala maternidade, husi númeru ne’e bebé mane hamutuk 48 no feto hamutuk 36, inklui na’in-rua mate iha inan nia kabun laran,” Zinia Mascarenhas, ko’alia iha HNGV, kuarta ne’e.
Nia esplika, husi semana santa ne’e totál inan partu hamutuk 84, partu normál 52, sezariana 13, vacun 17 no bebé mate iha inan nia kabun laran na’in-rua, maibé inan hirak-ne’ebé partu ho kondisaun normál.
Nia dehan, bebé na’in-rua ne’ebé mak mate iha kabun laran ne’e, kauza husi kilo seidauk to’o no ida seluk bee manas fakar liu ona oras, tanba ne’e mak lori to’o iha ospitál la salva.
“Tanba ne’e mate kedas iha kabun laran mak mai, no ida mak hetan transferénsia husi Sentru Saúde Munisípiu Likisá mak mai ho bee manas ne’ebé mak nakfera liu oras,” Xefe Ðepartamentu Maternidade husi HNGV ne’e fundamenta.
Husi kauza ne’e halo bebé hemu ona fo’er entaun provoka bebé tenke mate iha kabun-laran no lori mai to’o iha ospitál labele salva.
“Maibé ita observa de’it nia inan nune’e inan bele partu normál de’it,” nia subliña.
Xefe Maternidade ne’e fó hanoin ba inan sira bainhira isin-rua, tenke hakbesik-an ba postu saúde no pesoál saúde sira hodi hetan informasaun, nune’e evita problema sira-ne’ebé mak durante ne’e akontese.
“Ha’u-nia mensajen ba ha’u-nia feto maluk sira, no ha’u-nia inan feto sira-ne’ebé mak isin-rua, liuliu inan sira-ne’ebé mak hela iha área rurál sira, halo favór hakbesik ba postu saúde hodi hetan infomasaun kona-ba kondisaun bebé nian durante iha kabun laran,” Xefe Ðepartamentu Maternidade husi HNGV ne’e fó hanoin.
Antes ne’e, Xefe Maternidade HNGGV fó-sai katak, durante fulan-Janeiru to’o Marsu HNGV rejista bebé mate inan nia kabun laran hamutuk 52.
Husi janeiru to’o marsu inan ne’ebé mak partu iha sala maternidade hamutuk 1,554, husi ne’e partu normál hamutuk 1,014, sezariana hamutuk 372, vacum hamutuk 131 no bebé mate iha inan nia kabun laran hamutuk 52.
Jornalista : Felicidade Ximenes
Editór: Evaristo Soares Martins
