DILI, 23 Abríl 2025 (TATOLI) – Sentru komunikasaun arkiodioseze liuhusi Vigáriu Episkopál Pastorál arkiodioseze Dili, Pe. Juvito Rego de Jesus Araújo, hamutuk ho Ministru Administrasaun Estatál, Tomas do Rósario Cabral realiza konferénsia imprensa hodi fó sai informasaun kona-ba misa fúnebre amu Papa Francisco nian iha Timor-Leste.
Tanba ne’e, hakarak komunika ba públiku katak, misa funebre ba amu Papa Francisco nian sei hala’o iha Tasi-Tolu, iha loron sábadu (26/04/2025) ho oras tuku 18h00.
“Husu deskulpa tanba antes ne’e komunika tiha ona ba públiku hatene katak, misa sei hala’o iha loron domingu, maibé bainhira simu komunikadu ofisiál husi Vatikanu katak, amu Papa nia misa fúnebre iha Vatikanu sei hala’o iha loron (26/04/2025) ho oras tuku 10h00 dadeer,” Pe. Juvito Rego de Jesus Araújo informa ba jornalista sira iha, Kámara ekleziáastika arkiodioseze Dili, ohin.
Padre ne’e hateten, ohin iha ne’e, sentru komunikasaun arkiodioseze no Ministériu Estatál simu kna’ar reprezentante Governu hodi halo kooperasaun ba selebrasaun misa fúnebre amu Papa Francisco nian no fó omenajen ikus eternidade husi santu padre Francisco nian.
“Ne’e duni hakarak hatudu nafatin ba públiku katak bainhira amu Papa mai vizita ita-nia rai, Governu ho Igreja sempre servisu hamutuk atu simu iha momentu ne’ebá”, amu lulik ne’e hateten.
Amu Juvito dehan, maibé Maromak bolu ona nia, ba Na’i nia kadunan santu, nune’e misa ida-ne’e la’ós de’it ba sarani dioseze Dili, maibé lataka dalan mós ba sarani husi dioseze Maliana no Baukau hodi partisipa. Katak, sarani hotu-hotu hetan konvite hodi manifesta nia domin ba Papa Francisco.
Uza nafatin roupa Papa Francisco nian
“Kona-ba preparasaun korru sei responsabilidade husi Pe. Joel Casimiro Pinto, ne’ebé sei rekolla koru husi kada parókia hodi hananu iha ba misa fúnebre ne’ebé realiza iha Tasi-Tolu, no husu mós ba sarani sira-ne’ebé sei rai hela roupa Papa Francisco nian atu bele uza nafatin inklui lori lilin no ai-funan hodi sunu no rai iha altar Tasi-Tolu,”, nia informa.
Nia aumenta tan, buat hotu-hotu sei la’o tuir protokolu ne’e Governu prepara ona liuhusi koordenasaun ho autoridade seguransa no autoridade liña ministeriál sira-ne’ebé iha kompeténsia hodi partilla iha selebrasaun misa ida-ne’e.
“Tanba ne’e mak Governu mós servisu hamutuk ho igreja hodi fó kontribuisan ba apoiu selebrasaun misa fúnebre ida-ne’e, atu bele la’o di’ak no hetan kontrola maka’as husi parte seguransa PNTL no F-FDTL”, nia énfaze.
Iha fatin hanesan, Ministru Administrasaun Estatál, Tomas do Rósario Cabral hateten katak Governu serbisu hamutuk ho igreja, apoiu igreja Katólika para ita hala’o tiha seremónia ida-ne’e iha Tasi-tolu.
“Lala’ok sira ita dehan atu selebra misa iha Tasi-Tolu. Iha ne’ebá polísia mak sei organiza oinsá sarani sira bele tama ba iha ne’ebá no oinsá organiza mós transporte sira”, Ministru ne’e informa.
Governante ne’e esplika, tanba ita hotu hatene katak, se ita la organiza entaun transporte sei para arbiru hodi la fó asesu ba populasaun atu hola parte iha misa ida-ne’e.
“No kontribuisaun ba mídia sira importante teb-tebes iha Tasi-Tolu tanba sei halo tranzmisaun direta, nune’e maluk sarani sira iha foho ne’ebé la konsege partisipa maibé sira bele akompaña husi mídia”, autoridade ne’e hateten.
“Aleinde ne’e, prosesu fó omenajen ba amu Papa nian iha nunsiatura rezidénsia amu Bispu arkiodioseze Dili nian sei ramata orsida kalan. Maibé prosesaun iha na’in-feto Lesidere sei kontinua nafatin to’o loron sábadu hodi kontinua ba misa fúnebre iha Tasi-tolu”, nia hatutan tan.
“Hanesan komisaun organizadora sempre prepara nafatin kondisoens iha Tasi-Tolu hodi garante selebrasaun ida-ne’e bele la’o ho di’ak”, nia garante.
Tuir observasaun jornalista nian iha terenu, komisaun organizadora kompostu husi liña ministeriál no parte igreja kontinua prepara kondisaun fatin ba selebrasaun misa fínebre iha Tasi-Tolu, Dili.
Jornalista: Alexandra da Costa
Editór: Rafael Ximenes de A. Belo
