DILI, 23 Abríl 2025 (TATOLI)–Governu liuhusi servisu Sekretáriu Estadu Asuntu Toponímia no Organizasaun Urbana (SEATOU), fasilita lixeira 25 iha monumentu Nossa Senhora iha Lecidere, hodi fasilita atividade sarani sira-nia bainhira halo orasaun no presta omenajen ba falesimentu Sua Santidade Papa Francisco.
Diretora Jerál Toponímia Organizasaun Urbana, Maria Odete Barros Florindo, informa katak orientasaun ne’e mai husi Sekretáriu Estadu Germano Santa Brites Dias, hodi foti fali lixeiru ne’ebé antes ne’e rai iha Tibar, apoia fali ba iha Lecidere.
“Nune’e ema labele soe lixu arbiru no soe ba iha nia fatin ne’ebe mak preparadu ona. Nune’e, fasíl ba kompaña ida atu ra’ut foer ne’e. Ami mós sei halo kooerdenasaun ho Munisípiu Dili atu halo kontrola másimu ba lixeiru,” Diretora ne’e esplika ba jornalista TATOLI, ohin.
Ezekutiva ne’e haktuir, lixeiru ka kaixote lixu ne’e foti husi Tibar, ne’ebé antes ne’e rai iha Kaikoli no iha Portu Dili, no sira hatene nia kuantidade nune’e sira ba foti de’it lixeiru rua nulu resin-lima hodi apoia iha Lesidere.
“Lixu sira ne’e posibildade tau de’it durante tempu adorasaun ne’e, bainhira hotu ona, entaun lixeiru sira ne’e sei lori ba tau fali iha fatin balun ne’ebé lixeiru laiha ka depende ba autoridade munisipál nia organiza”, nia dehan.
Nia akresenta tan katak, “Ami mós fahe ba ekipa rua; Diresaun Jerál Toponímia Organizasaun Urbana no Diresaun Nasionál Toponímia sei organiza ba preparasaun iha Tasi-Tolu. Enkuantu, Diresaun Nasionál Urbanizasaun Urbana ho Diresaun Nasionál Jestaun Ijiéne Orden Públika inklui Ministériu Administrasaun Estatál mak tau matan iha Jardin Lecidere”.
Entretantu tuir observasaun jornalista TATOLI nian iha terrenu nota katak parte saneamentu sira kontinua halo limpeza. Nune’e mós, prosesaun ba adorasaun daudaun ne’e kontinua no hetan partisipasaun hosi liña ministeriál sira no entidade relevante sira hanesan PDHJ, APC, Sekretáriu Estadu Água no Floresta, CNE, MESSCC, Tribunál Distritál Dili, MI, Bankada FRETILIN, Tenente Jenerál reformadu, Lere Anan Timur, GASC, Vise Primeiru-Ministru no Universitáriu sira.
Jornalista: Alexandra da Costa
Editór: Rafael Ximenes de A. Belo
