KOVALIMA, 23 Abríl 2025 (TATOLI) – Sekretáriu Estadu Formasaun Profesionál no Empregu (SEFOPE) ho nia komitiva hamutuk ho Prezidente Autoridade Munisípiu (PAM) Kovalima, entrega sertifikadu ba kandidatu traballadór Austrália hamutuk 255, iha aldeia Lakonak besik, Postu administrativu Suai, Munisípiu Kovalima.
Kandidatu traballadór ne’ebé mak simu sertifikadu dalen Inglés nível III tuir formasaun dalen Inglés faze ba dahuluk, ne’ebé tuir formasaun durante fulan tolu, iha salaun Eskola Tékniku Vokasionál Akar-laran no salaun sentru SKA Mosu.
Sekretáriu Estadu Rogerio Araujo Mendonça hateten katak atividade entrega sertifiladu ba fomandu ne’ebe tuir formasaun dalen Inglés hodi kompleta ona Programa Mobilidade Traballadór Pasífiku Austrália (PALM).
“Formandu na’in -255 simu sertifikadu signifika imi sei ba aprezenta iha munisípiu ho profile kompletu hodi hetan rekomendasaun nune’e bele update (atualiza) iha sistema atu empregadór bele simu , nune’e ita-boot sira ba servisu iha Austrália”, Sekretáriu Estadu Rogerio Araujo Mendonça, hato’o iha-nia diskursu , molok entrega sertifikadu ba formadu sira, iha Aldeia Lakonak Besik, ohin.
Governante ne’e fó hanoin, hafoin simu sertifikadu hein atu ba servisu iha Austrália de’it, maibé imi hetan espesiál tanba ema barak ko’alia Inglés di’ak la iha sertifikadu, nia naran la iha sistema, labele ba serbisu iha Austrália.
Realidade hatudu katak, kandidatu traballadór iha tinan kotuk, balun valór Excelent, Verry Good (Di’ak liu), Good (Di’ak) , sufisente no menus husi sufisente mak hetan oportunidade tuir formasaun hafoin bele asesu empregu ba iha rai-li’ur.
“Ha’u rekomenda ba formandu 255, ha’u fiar ita-boot sira-nia esperansa bo’ot ba Austrália ho nune’e mane sira redús fuma, hemu tua bainhira teste saúde la liu; falla”, nia fó hanoin.
Formasaun hanesan parte ida hasa’e abilidade hodi buka servisu no bele mós mellora nafatin edukasaun formasaun dalen Inglés, área ne’ebé mak merkadu presiza.
Aleinde sekretáriu Estadu entrega sertifikadu ba kandidatu traballadór Austrália, iha biban ne’e mós entrega sertifikadu apresiasaun ba formadór sira ne’ebé mak durante ne’e akompaña formandu sira halo konstrusaun sentru formasaun.
Fó hanoin fali katak, iha loron 04 Marsu 2024 ne’e Sekretária Estadu Formasaun Profesionál no Empregu hala’o abertura hodi fó teste eskrita lian Inglés ba kandidatu traballadór timoroan na’in -3.184 husi Kovalima ne’ebé konkorre vaga servisu ba Austrália liuhusi sistema online.
Jornalista: Celestina Teles
Editór: Rafael Ximenes de A. Belo
