KOVALIMA, 23 Abríl 2025 (TATOLI) – Sekretáriu Estadu Formasaun Profesionál no Empregu (SEFOPE) ho nia komitiva hamutuk ho Prezidente Autoridade Munisípiu (PAM) Kovalima, inaugura sentru formasaun dalen Inglés iha aldeia Lakonak besik, Postu administrativu Suai,cMunisípiu Kovalima.
Sekretáriu Estadu SEFOPE, Rogerio Araujo Mendonça informa, hafoin simu pasta hanesan sekretáriu Estadu, iha programa mobilidade laborál ba iha Austrália, Korea, Japaun no Nova Zelándia iha tempu-badak atu asina akordu.
“Ami identifika Kovalima menus fatin sentru formasaun tanba merkadu presiza traballdór barak hanesan iha Austrália no seluktan, oinsá polítika Governu hodi garante kualidade formasaun, abilidade hodi responde ba merkadu traballu”, Sekretáriu Estadu, Rogerio Araujo Mendonça hato’o iha nia diskursu, molok inaugura sentru formasaun dalen Inglés iha Aldeia Lakonak Besik, ohin.
Governante ne’e dehan, atu responde ba merkadu traballu presiza sentru formasaun atu akumula joven sira ne’ebé kontinua estudu no balun ne’ebé la iha apoiu finanseira atu kontinua estudu iha ensinu superiór tenke tuir formasaun hodi asesu ba empregu.
Governu estabelese sentru formasaun iha munisípiu Kovalima parte ida atu ajuda autoridade munisípiu tanba joven barak finaliza ensinu sekundáriu tuir formasaun konsentra iha Dili presiza kustu atu tuir formasaun.
“Ho nune’e Nonu Governu konstitusionál lori sentru formasaun mai iha munisípiu atu tulun ita-boot sira, ba sira ne’ebé ladun iha finanseira tuir de’it formasaun iha munisípiu tanba ita-boot sira mós hetan rekrutamentu”, nia garante.
Iha sorin seluk, Diretora-ezekutiva , Sentru Formasaun Senai Becora, Bernadete Miranda Pinto hato’o relatóriu katak molok atu konstrui sentru formasaun ba dahuluk forma ekipa, vizita fatin, halo rekruta formandu na’in-10 no asina kontratu implementasaun servisu konstrusaun.
Sentru formasaun dalen Inglés iha Kovalima konstrui husi formasaun na’in-10 ne’ebé uma ho nia medida 27×8,5 ho sala-aula tolu kompleta ho haris-fatin rua.
Orsamentu ba konstrusaun ne’e hamutuk rihun 78-resin ne’ebé gasta ba item sira hanesan pagamentu (fee) ba formadór rihun-lima, ba formandu na’in-10 $ 6. 575 no kustu ba lansamentu hamutuk rihun-lima.
“Ami gasta orsamentu ba konstrusaun ne’ebé ho nia durasaun durante fulan neen, hahú Novembru 2024 ne’ebé ohin hetan ona inaugurasaun”, nia relata.
PAM Kovalima, Miguel Armada Cardoso, hato’o agradese ba SEFOPE tanba iha hanoin hodi konstrui sentru formasaun dalen Inglés ba joven sira iha munisípiu Kovalima.
“Ohin loron inaugura sentru formasaun, fatin ida-ne’e atu eduka joven sira. Ita orgullu, fatin iha ona, oinsá mak bele aprende, ita-boot sira atu halo saida, joven sira hanesan reprezentativa labele buka problema maibé presiza atu aprende”, nia fó hanoin.
Autoridade Kovalima, konstrusaun sentru formasaun dalen Ingles hanesan parte ida atu halibur joven sira ne’ebé mak hakarak aprende dalen Inglés tanba Kovalima potensiál ba mina no seluktan nune’e presiza aprende.
Jornalista:Celestina Teles
Editór: Rafael Ximenes de A. Belo
