VIKEKE, 23 Abríl 2025 (TATOLI)—Prezidente Autoridade Munisípiu (PAM) Vikeke, Francisco Cruz Simões de Gonzaga Soares, hateten husi OJE 2025 ne’ebé prevee ba munisípiu Vikeke hamutuk $19,460,106.00 ne’e, liuliu iha trimestre dahuluk (Janeiru-Marsu) ne’e munisípiu Vikeke ezekuta ona 16%.
“Atinjimentu sei kiik tanba projetu barak mak seidauk implementa hanesan projetu Programa Dezenvolvimentu Nasionál Suku (PNDS) no projetu husi Programa Integradu Dezenvolvimentu Munisipál (PIDM) ne’ebé daudaun sei iha prosesu aprovizionamentu. Maibé, agora prosesu tama ona komitmentu ne’ebé automatikamente ninia progresu iha mundasa. Ha’u hanoin ezekusaun orsamentu ne’e iha fulan sei mundansa,” nia hateten ba Agência Tatoli iha Vikeke, ohin.
Kona-ba ezekusaun, PAM Vikeke ne’e hateten daudaun ne’e kapitál dezenvolvimentu seidauk implementa inklui mós kapitál menór seidauk implementa.
“Orsamentu ba kapitál dezenvolvimentu ita foin mak faan dokumentu projetu nian, inklui mós ba kapitál menór. Prosesu sira-ne’e kle’ur, tanba pre-kualifikasaun mak sai kle’ur, ne’ebé agora ita sei prosesu ba iha aprovizionamentu,” nia hateten.
Daudaun ne’e, nia dehan, programa merenda eskolár no saláriu vensimentu ba funsionáriu sira mak implementa ona.
“Ezekusaun ne’ebé daudaun ne’e ami implementa ona mak programa merenda eskolár aloka $915,425 no saláriu vensimentu. Programa sira seluk seidauk implementa, ha’u fiar kata iha fulan oin ezekusaun sei boot,” nia dehan.
Enkuantu, tuir dadus ezekusaun husi portál transferénsia alokasaun orsamentu ba munisípiu Vikeke orijinál $19,460,106.00, kompromisu sira $1,804,338.75, Obrigasaun sira $546,159.74, Atuál 1,619,824.39, saldo $15,489,783.12 no ezekusaun 11.1%.
Jornalista : Vitorino Lopes da Costa
Editór : Cancio Ximenes
