VIKEKE, 24 Abríl 2025 (TATOLI)—Prezidente Autoridade munisípiu (PAM) Vikeke, Francisco Cruz Simões de Gonzaga Soares, orienta ona xefe suku no instuisaun sira iha Vikeke hasa’e bandeira RDTL ‘meia-haste’ hodi fó omenajen ikus ba Sua Santidade Papa Francisco ne’ebé hakotu iha iha segunda (21 Abríl 2024) ne’e.
“Depois ita rona sua santidade Papa Francisco nian mate, Ministru Administrasaun Estatál orienta kedas ami, hodi orienta ba xefe suku no instituisaun sira iha Vikeke hasa’e bandeira ho meia-haste ka setengah tian. Nune’e, daudaun ne’e ita observa iha Vikeke hahú husi sede suku, aldeia, edfísiu eskola no instituisaun sira iha munisípiu Vikeke laran hasa’e hasa’e bandeia to’o iha ai-rin klaran,” Francisco Cruz Simões de Gonzaga Soares hateten ba TATOLI, iha ninia knaar fatin, ohin.
Autoridade munisípiu Vikeke ne’e hatutan, Governu deklara lutu nasionál durante semana ida ne’ebé bandeira hahú husi adiministrasaun to’o suku no aldeia ne’e bandeia hasa’e ‘meia-haste’.
“Ita nu’udar sarani katóliku lakon líder di’ak ida. Depois amu papa ninia deklarasaun dehan ‘Ha’u-nia Maromak la’ós Maromak Katóliku, maibé ha’u-nia Maromak universal’ signifika katak nia lider ida-ne’ebé karismátiku, lider ne’ebé ba ema hotu,” nia dehan.
Tanba ne’e, nia dehan, sua santidade Papa Francisco nia mate husik hela tristeza ba ema hotu, ne’ebé mak gosta dame, amizade no papa hakarak mak faternidade umana sai importante liu.
“Ita sente lakon ema ida-ne’ebé promotor ba fraternidade umana tanba nia la haree kór, rasa no relijiaun ne’ebé nu’udár ema umana ita ida de’it,” nia dehan.
Nune’e mós, nia husu, komunidade no joven sira iha Vikeke kumpre regra sira-ne’ebé Governu fó-sai ona lutu nasionál ne’ebé labele toka muzika, labele halo barullu iha barru sira
“Ita tenke kumpre ba dekretu Governu lutu nasionál ne’ebé ha’u husu joven sira labele halo barullu, tanba ita sei iha ambiente ida lutu nasionál sua santidade papa Francisco ne’ebé husik i’is, iha loron segunda 21 fulan Abríl ne’e,” nia hateten.
Tuir observasaun jornlista TATOLI nota katak iha instituisaun públiku, edfísiu eskola inklui Igreja sira-ne’ebé eziste iha munisípiu Vikeke hasa’e ona bandeira ho meia-haste.
Jornalista : Vitorino Lopes da Costa
Editór : Cancio Ximenes
